दाङ : बडादशैंँका अवसरमा दाङका छ महिला सहकारीले करिब दुई करोड रुपैयाँको खसीबोका उत्पादन गरेर बिक्री गरेका छन्। यस वर्षको दशैँमा सबैभन्दा बढी लमही नगरपालिका–९ रिहारमा रहेको कर्मठ सामाजिक उद्यमी महिला सहकारी संस्थाले ९० लाख ४१ हजार रुपैयाँका एक हजार ५३० वटा खसीबोका बिक्री गरेको छ।
सहकारी संस्थाका अध्यक्ष देवीमाया थापाले सहकारीमा आबद्ध महिलाले उत्पादन गरेका खसीबोका एकमुष्ट सङ्कलन गरेर सहकारीमार्फत नै व्यापारीलाई बिक्री गरिएको जानकारी दिइन्। सहकारीले उत्पादन गरेका खसीबोका थोरै मात्र जिल्लामा खपत भएको र अन्य सबै जिल्ला बाहिर एवम् राजधानी पठाइएको उनले बताइन्। सहकारीले यस वर्ष करिब तीन हजार ५०० खसीबोका बिक्री गर्ने लक्ष्य राखेको छ।
यस्तै, लमही नगरपालिका–८ सतबरियामा रहेको नीलकमल सामाजिक उद्यमी महिला सहकारी संस्थाले ४५ लाख ४४ हजार रुपैयाँ बराबरको खसीबोका बिक्री गरेको छ। सहकारीमा आबद्ध महिलाले उत्पादन गरेका ८७६ खसीबोका दशैँमा बिक्री गरिएको हो। यस वर्ष करिब दुई हजार ८०० खसीबोका सहकारीले बिक्री गर्ने लक्ष्य लिएको सहकारीका अध्यक्ष पुनम घर्तीले बताइन्।
दीपन सहकारी संस्थाले पनि ८७६ खसीबोका २८ लाख ९६ हजार रुपैयाँमा बिक्री गरेको छ। घोराही उपमहानगरपालिका–१३ मा रहेको ज्यामिरे महिला सहकारीले पनि ४६७ खसीबोका १४ लाख ८०९ रुपैयाँमा बिक्री गरेको छ। समुन्नति सामाजिक उद्यमी महिला सहकारीले ८९६ खसीबोका १५ लाख ५६ हजार रुपैयाँमा बिक्री गरेको छ।
सहकारीमा आबद्ध महिलाले उत्पादन गरेका खसीबोका सहकारीका सहजकर्तामार्फत घरघरमा पुगेर उनीहरुकै अगाडि तौलिएर बेच्ने गरिएको सहकारी सहजकर्ता पावती बस्नेतले जानकारी दिइन्। महिलालाई उत्पादन र उद्यमसँग जोड्ने उद्देश्यले दाङसहित प्युठान र सल्यानमा पनि ग्रामीण महिला उत्थान केन्द्रले महिला सहकारी संस्था स्थापना गरेको थियो।
केन्द्रद्वारा सञ्चालित पशु वस्तुको मूल्य शृङ्खलामा आधारित साना किसान परियोजनाका कार्यक्रम संयोजक भीमकान्त चौधरीका अनुसार तीन जिल्लाका १२ सहकारीले दशैँमा मात्रै आठ हजार ८५० खसीबोका बिक्री गरेका छन्। उनका अनुसार दाङका छ, प्युठानका तीन र सल्यानका तीन सहकारीले तीन करोड मूल्य बरावरको खसीबोका बिक्री गरेका छन्। ती तीन जिल्लामा दुई करोड ९८ लाख ४६ हजार ९८१ रुपैयाँ बराबरको खसीबोका बिक्री गरिएको छ। ती सहकारीमा आबद्ध महिलाले यस वर्ष करीब २० हजार ३३४ खसीबोका उत्पादन गर्ने लक्ष्य लिएका छन्।
अहिले जिल्लामा करीब दर्जन बढी महिला उद्यमी सहकारी संस्थाले सहकारी सदस्यमार्फत खसीबोका, कुखुरा, हाँस र दूध उत्पादनको काम गरिरहेका छन्। महिला उत्थान केन्द्रको मातहतमा रहेका ती सहकारी एउटामा कम्तीमा ५०० देखि एक हजारसम्म सदस्य छन्। उनीहरु उत्पादनको काममा सक्रिय छन्। तिनै सहकारीले अहिले जिल्लामा खसीबोकाको माग धानी राजधानीसम्म पठाउने काम गरिरहेका छन्।
सहकारीमा महिलाले २५ किलोभन्दा माथि जिउँदो खसी रु ५३५ प्रतिकिलो, २० देखि २५ किलोसम्मको रु ५१० प्रतिकिलो र बोका २० किलोदेखि माथि रु ५१० प्रतिकिलोमा घरैबाट बिक्री गरेका थिए।
तपाईंको ईमेल गोप्य राखिनेछ ।