काठमाडौं : निवर्तमान सभामुख कृष्णबहादुर महरालाई थप पाँच दिन हिरासतमा राख्ने अनुमति जिल्ला अदालत काठमाडौंले दिएको छ।
जिल्ला सरकारी वकिलको कार्यालयमा करिब ७ घण्टा बयानपछि आइतवार अपरान्ह उपस्थित गराइएका महरालाई शनिबारदेखि लागू हुने गरी थप पाँच दिन हिरासतमा राख्न न्यायाधीश बाबुराम सुवेदीको इजलासले अनुमति दिएको हो।
बयान दिन इन्कार गरेको समाचार आएपछि महराले आइतवार जिल्ला सरकारी वकिलसँग यो प्रकरणमा पहिलो पटक बयान दिएका थिए। अब महरालाई सरकारी वकिलले आगामी बुधबार अदालतमा उपस्थित गराउने छन्।
गत असोज १९ गतेदेखि प्रहरीको हिरासतमा परेका महरा पछिल्लो समय स्वास्थ्यमा समस्या देखिएपछि थापाथलीस्थित नर्भिक अस्पतालमा रहेका छन्। उच्च रक्तचाप सहितका समस्याबाट पीडित भएर अस्पतालमा रहेका महराले बलात्कार प्रकरणबारे बयान दिन अस्वीकार गरेको भन्दै एकसाता यता निरन्तर समाचार आएका थिए।
आफुले बयान दिन अस्वीकार गरेको भन्ने कुरा सरासर झुटो रहेको उल्लेख गर्दै उनले अनुसन्धानमा सघाउने बताएका थिए। ‘उहाँ (महरा) ले आफूलाई सोध्दै नसोधी बयान अस्वीकार गरेको भन्दै समाचार लेखिएकोमा असन्तुष्टि जनाउनुभएको छ’, महराका वकिल मुरारी सापकोटाले भने, ‘आफुसँग सम्बन्धित कुरामा एकपक्षीय समाचार लेखेर ‘मिडिया ट्रायल गरिएको गुनासो उहाँले गर्नुभएको छ।’
संसद सचिवालयकी एक महिला कर्मचारीले आफुमाथि कोठामै आएर महराले कुटपिट गर्दै बलात्कार गरेको जाहेरी गत असोज १८ गते महानगरीय प्रहरी वृत्त तीनकुनेमा दिएकी थिइन्।
उनको जाहेरीका आधारमा वृत्तका डिएसपी दुर्गा रेग्मीसहितको टोलीले त्यसको भोलिपल्ट महरालाई बालुवाटारस्थित सरकारी निवासबाट पक्राउ गरेको थियो।
महरालाई १० दिनसम्म हिरासतमा राखेर असोज २८ गते जिल्ला अदालतमा तीन दिन म्याद शुक्रबारसम्म थपिएको थियो। शुक्रबारै सरकारी वकिलले अदालतमा लान नभ्याएपछि थप एक दिन हिरासतमा राखेर आज जिल्ला अदालतमा पेश गरिएको हो।
तपाईंको ईमेल गोप्य राखिनेछ ।