काठमाडौं : दार्चुला जिल्लाको त्रिदेशीय नाका तिङ्कर नाका तत्काल खोल्न सरोकारवालाले सरकारसँग माग गरेका छन्।
दार्चुला जिल्ला ब्याँस गाविसका बासिन्दाले बिहीबार काठमाडौंमा आयोजना गरेको अन्तरक्रियामा सहभागीले तिंकर नाका तत्काल खोल्न सकेमा दार्चुलाको मात्र नभई समग्र मुलुकको विकास गर्न सकिने सुझाएका हुन्।
नेकपा (एमाले) का सांसद गणेशसिंह ठगुन्नाले चिनियाँ पक्ष तिंकर नाका खोल्नका लागि सकारात्मक रहेको भएपनि सरकार यस विषयमा संवेदनशील नरहेको आरोप लगाए।
ठगुन्नाले भने, “कैलाश पर्वत हिन्दूको महत्वपूर्ण तीर्थस्थल हो, जहाँ प्रत्येक वर्ष पाँचलाख भक्तालुले दर्शन गर्छन्, अर्कोतर्फ आफ्नै गाउँबस्तीमा जान पनि भारतीय बाटोको प्रयोग गर्नुपर्ने बाध्यताको अन्त्य हुन्छ, मैले संसद्मा १० पटक यस बारेमा आवाज उठाएको छु तर सुनुवाइ भएको छैन।”
नेपाली काँग्रेस जिल्ला सभापति ललितसिँह बोहराले तिंकर नाका खोल्ने काममा ढिलासुस्ती भइरहेको बताउँदै राज्यको कुनै पनि निकायको उपस्थिति नहुँदा त्यहाँको सुरक्षामा समस्या रहेको र छिमेकी राष्ट्र भारत तथा चीनले आफ्नो सुरक्षाकर्मी राखेको जानकारी गराए।
उद्योग वाणिज्य सङ्घ दार्चुलाका उपाध्यक्ष ग्याल्बु सिंहले देशमा कालापानी र लिपुलेकको नाममा राजनीति गर्नेको सङ्ख्या धेरै भए पनि सो क्षेत्रको सुरक्षामा ध्यान जान नसकेको बताए।
ग्याल्बुले भने, “एक्काइसौँ शताब्दीमा पनि आफ्नै बस्तीमा जानका लागि अरूको भूमि प्रयोग गर्नुपर्छ, भारतीय प्रहरीको अत्याचारको सिकार बन्नुपरेको छ।”
कार्यक्रममा नगेन्द्र तिङ्करीले सरकारलाई तिंकर नाका खोल्ने विषयमा दबाबका लागि सघाउन सञ्चारकर्मीलाई आग्रह गरेका थिए।
तपाईंको ईमेल गोप्य राखिनेछ ।