काठमाडौं : नेपथ्य ब्याण्ड शनिबार सिड्नीमा तेस्रो पटक प्रस्तुत हुँदैगर्दा पनि २९ सय ५० दर्शक क्षमताको लुनापार्कस्थित ‘बिगटप अडिटोरियम’ टनाटन नै थियो। तर, नेपाली मनोरञ्जनका क्षेत्रमा एउटा नयाँ संभावनाको ढोका खोलेकै कारण यसपटकका यी ‘हाउसफूल दर्शक’ भने उल्लेखनीय बन्न पुगे। यी दर्शक कार्यक्रम हुने बेलामा ढोका छेउ बिक्री गरिने टिकटघर भएर गुज्रिएका थिएनन्।
सबका सब कम्प्युटरबाटै खरिद बिक्री गरिएको टिकटबाटै उपस्थित थिए। संसारभर प्रतिष्ठित अन्तर्राष्ट्रिय कन्सर्टहरूमा ‘अनलाइन टिकट’ पूर्ण क्षमताका साथ अभ्यासमा आइसकेता पनि नेपाली मनोरञ्जन उद्योगमा यसको उपादेयता अझै सन्देहको घेरामा थियो।
नेपथ्यको व्यवस्थापन गर्दैआएको संस्था नेपालयले भने यसप्रकारको कार्यक्रममा ‘अनलाइन टिकट’लाई नै स्थापित गर्ने प्रयास गर्दै आइरहेको थियो। यस्तो बेला अन्ततोगत्वा सिड्नीमा यस वर्ष नेपथ्य कन्सर्टका शतप्रतिशत टिकट ‘अनलाइन’बाटै बिक्री भएर नयाँ रेकर्ड कायम हुन पुगेको छ।
अनलाइनमा राखिएको टिकट बिक्रीको संकेतले कन्सर्ट सुरु हुनुभन्दा धेरै अगाडि नै कम्प्युटरका पर्दाहरूमा ‘सोल्ड आउट’ (सबै टिकट बिक्री भइसकेको) जानकारी दिएको थियो।
‘नेपाली कार्यक्रमको सम्पूर्ण टिकट यसरी इन्टरनेटबाटै सकिएको हेर्ने मेरो लामो समयदेखिको सपना यसपाला सिड्नीले पूरा गरिदिएको छ’, नेपालयका किरणकृष्ण श्रेष्ठ भने,‘यत्रो ठूलो आयोजनालाई पूर्णतया अनलाइनको पोल्टामा सुम्पनु धेरै ठूलो जोखिम थियो। जसलाई चुनौतिका रुपमा स्वीकार्न सिड्नीका आयोजक ‘नेपाली टच’ तयार भइदियो र परिणाममा हामीले यति ठूलो सफलता हात पारेका छौं।’
शनिबारको कन्सर्टमा पनि नेपथ्यले सिड्नीका दर्शकलाई सँधैजस्तै लोक रकका भाकाले तरंगीत पार्न सफल भएको छ। ब्याण्डको उपस्थितिलाई अझ भव्य बनाउन सदाबहार र नयाँ गीतको सन्तुलित चयन मात्र नभइ प्राविधिक हिसाबले पनि अझ स्तरीय प्रस्तुतीको प्रयास गरिएको थियो। यो कन्सर्टका साथ नेपथ्य अष्ट्रेलियाकै यस व्यापारिक राजधानीमा छैठौंपटक सफलताका साथ प्रस्तुत भएको छ।
विश्वकै प्रसिद्धतम यस शहरले पृथ्वीको दक्षिणी गोलार्द्धमै नेपथ्यलाई सबैभन्दा बढी माया गर्ने दर्शकको शहरका रुपमा पनि आफूलाई उभ्याउँदै आएको छ।अष्ट्रेलियाभरमै सबैभन्दा बढी नेपाली बसोबास गर्ने यो शहरमा नेपथ्यले सन् २००९ मा आफूलाई पहिलो पटक उभ्याएको थियो। त्यतिबेला एक विश्वविद्यालयको हलमा १२ सय दर्शक मात्र उपस्थित थिए।
त्यसयता ब्याण्डले यो विशाल टापुरुपी मुलुकमा पाँचपटक यात्रा गरिसकेको छ। त्यसमध्ये सन् २०१२ विशेष उल्लेखनीय थियो, जतिबेला २२ सय क्षमताको सिड्नी टाउनहलमा दर्शक नअटाएर बाहिर रहन पुगेको भीँडले ट्राफिक जाम भएको थियो। त्यसपछि सन् २०१५ यता लुनापार्कको यो अडिटोरियममा नेपथ्य प्रस्तुत हुँदै आएको हो।
नेपथ्यले पाँच पटकसम्म आफूलाई प्रस्तुत गरेको नेपालकै शहरहरूमा पनि केवल काठमाडौं, पोखरा, बुटवल, चितवन, हेटौंडा र धनगढी मात्र रहेको अवस्थामा मुलुकबाहिर सिड्नी पनि बन्न पुगेको छ।
‘सिड्नी मेरो निम्ति आत्मीय शहर हो। जहाँ म घरमा जस्तै सर्वत्र आफूलाई माया गर्नेहरू भेटिरहेको हुन्छु’ नेपथ्यका मुख्य गायक एवं अगुवा अमृत गुरुङले भने, ‘अहिले भन्दा थोरै नेपाली बसोबास गर्दाको पहिलो कन्सर्ट म झल्झली सम्झन्छु। यो दस वर्षको बीचमा नेपालीको संख्या धेरै गुणाले बढिसकेको छ। सिड्नी मात्र नभइ विश्वभर यसरी नेपाली समुदायको उपस्थिति बाक्लिँदै गइरहेकोमा खुशी लाग्छ। तर, स्वदेशमा अवसरको अभाव भएकैले यसरी नेपाली बाहिरिन बाध्य भएको सत्य आत्मसात गर्नुपर्दा चाहिँ तितो लाग्दोरहेछ।’
अमृतले यसरी ‘ब्रेन’ र तन्नेरीको ‘ड्रेन’ छिट्टै थामिएर नेपाल आफैँमा अवसरले भरिएको एक समृद्ध मुलुक बन्ने विश्वास पनि प्रकट गरे। ‘तपाइँजस्ता तन्नेरीमै म मुलुकको भविष्य देख्दैछु। जसले यता आर्जन गरेको ज्ञान र सीप बोकेर फर्कदैँ स्वदेशलाई समृद्ध बनाउनु हुनेछ’, उनले अपिल गर्दै भने, ‘अघिल्ला पुस्ताले हाम्रा निम्ति अवसर तयार नपारिदिएता पनि हामीले आउने पुस्ताका निम्ति चाहिँ नेपालमा पर्याप्त संभावना थुपारिदिनु पर्छ।’
कन्सर्टमा गीत संगीतसँगै समानान्तर रुपमा नेपालका हिमाल, पहाड र तराइका दृश्यहरूले पनि यात्रा गरेका थिए। पर्दामा प्रस्तुत स्वदेशका ती तस्बीरले गुञ्जँदै गरेका गीतको भावभूमि देखाउँथ्यो। गायक अमृतले गीत संकलनका क्रममा मुलुकभर यात्रा गर्दा खिचेका तस्वीरको संकलनबाटै ती दृश्यहरू निकालिएका थिए।
‘हाम्रो मुलुक धेरै सुन्दर छ’, गाउँदा गाउँदै बीचमा अमृत भनिरहेका थिए, ‘अर्कोपटक स्वदेश फिर्दा सहरबाट निस्केर गाउँको यात्रा गर्न नछुटाउनु होला। तपाइँका अष्ट्रेलियन साथीहरू छन् भने उनीहरूलाई पनि साथमा ल्याउन नभुल्नु होला।’
नेपथ्यले यसपाला अष्ट्रेलियाको श्रृंखलावद्ध यात्राका लागि सिड्नीकै संस्था ‘नेपाली टच’ सँग सहकार्य गरेको छ। ‘यो वर्ष नेपथ्यलाई हामीले निम्त्याउन पाउँदा असाध्यै गौरव महशुस भएको छ’, संस्थाका तर्फबाट यस श्रृंखलाका संयोजक दिपेश पुनले भने, ‘सिड्नी बाहेकका शहरहरूको आयोजनामा सघाउने सम्पूर्ण स्थानीय आयोजकलाई म धन्यवाद पनि दिन चाहन्छु।’
सिड्नीको कन्सर्ट सम्पन्न भएसँगै यस वर्षको नेपथ्य अष्ट्रेलिया श्रृंखलाको अन्त्य डिसेम्बर २३ मा मेलबर्नको ‘द पाम्स एट क्राउन’ मा पुगेर हुनेछ। कन्सर्टमा अमृतलाई सँधैजस्तै ड्रमसेटमा ध्रुव लामा, किबोर्डमा सुरज थापा, गितारमा निरज गुरुङ, बेस गितारमा सुविन शाक्य र मादलमा शान्ति रायमाझीले सघाएका थिए।
तपाईंको ईमेल गोप्य राखिनेछ ।