२१ पुल, १० वटा आकाशे पुल पनि निर्माण हुने
२१ पुल, १० वटा आकाशे पुल पनि निर्माण हुने
काठमाडौं : नागढुंगादेखि मुग्लिनसम्मको ९४ दशमलव सात किलोमिटर सडक विस्तार गरिने भएको छ। हाल एकदेखि दुई लेन चौडाइको सडकलाई चारदेखि ६ लेनसम्म विस्तार गर्न लागिएको हो।
सडकमा साँघुरा मोड रहेकाले त्यसलाईसमेत सुधार गरिने सडक विभागले जनाएको छ। मोड सुधार गर्दा सडकको लम्बाई पनि केही घट्ने सडक विभाग, विकास सहायता समन्वय महाशाखाका प्रमुख अर्जुनजङ्ग थापाले बताए।
यस सडकमा सम्भव भएसम्म ६ लेन बनाइने छ भने नसकिने स्थानमा चार लेनमा विस्तार गरिनेछ। 'गजुरी, मलेखुलगायतका बजार क्षेत्रमा चार लेन सडक बन्ने छ', उनले भने।
सडक विस्तारका क्रममा २१ पुलसमेत निर्माण गरिने भएको छ। ती सबै पुल चार लेनको हुने बताइएको छ। हाल भइरहेका पुल दुई लेन मात्रै भएकाले त्यसलाई नभत्काई त्यससँगै ‘साइड’मा सडक जत्तिकै चौडाइको पुल निर्माण गर्न लागिएको हो।
यही परियोजनाअन्तर्गत झण्डै १० वटा आकाशेपुल निर्माण गर्ने योजना छ। यो सडकखण्ड विस्तारका लागि विस्तृत परियोजना प्रतिवेदन (डिपिआर) र वातावरणीय तथा सामाजिक प्रभाव मूल्याङ्कन प्रतिवेदन (इएसआइए) तयार भइसकेको छ।
नागढुंगा-नौबिसे-मुग्लिन सडकखण्ड रणनीतक सडक पहुँच तथा व्यापारिक सुधार आयोजनाअन्तर्गत स्तरोन्नति गर्न लागिएको हो। सडक त्रिभुवन राजपथअन्तर्गत नागढुंगादेखि नौबिसेसम्म १२ दशमलव ७ किमी र पुथ्वी राजमार्गअन्तर्गत नौबिसे-मुग्लिन ८२ दशमलव चार किमी छ।
विश्व बैंकको ऋण सहयोगमा यो सडकखण्डको विस्तार गर्न लागिएको हो। सडक निर्माण भएको पाँच वर्षसम्म सम्बन्धित निर्माण कम्पनीले नै सडकको मर्मतसम्भार गर्नुपर्ने प्रावधानसहित अन्तर्राष्ट्रिय बोलपत्र आह्वान गरिनेछ। यो सडक निर्माणका लागि झण्डै १६ अर्ब रुपैयाँ लाग्ने अनुमान गरिएको छ। सडक विस्तारमा तीन वर्ष लाग्ने अनुमान गरिएको छ।
यो सडक प्रदेश ३ को काठमाडौँ, धादिङ र चितवन जिल्लामा फैलिएको छ। काठमाडौँ जिल्लाको नागढुंगा चेकपोस्टबाट शुरु भएर नौबिसे, खानीखोला, महादेवबेँसी, गल्छी, बैरेनी, मलेखु बेनीघाट, कुरिनटार हुँदै चितवन जिल्लाको मुग्लिनसम्म सडक छ।
यो सडक एशियाली राजमार्ग मापदण्डानुसार दुई लेन, सात मिटर ‘क्यारिजवे’ र एकदेखि दुई दशमलव पाँच मिटरसम्म ‘सोल्जर’सहित स्तरोन्नति गर्न लागिएको हो।
एक वर्षमा खरिद प्रक्रियालगायतका कागजी प्रक्रिया पूरा गर्ने र अर्को वर्षदेखि सडक विस्तार गरिने योजना रहेको विभागले जनाएको छ।
यस सडकको विस्तारको तयारीसँगै त्यसको विकल्पका रूपमा त्रिशूली नदी पारिपट्टिको सडक निर्माणको योजना बनाइएको छ। राजमार्गको समानान्तरमा गल्छीदेखि विशालटारम्म दुई लेनको सहायक सडक निर्माण गर्न लागिएको हो।
पहिले नै ट्र्याक खुलिसकेको सडक भएकाले यसलाई स्तरोन्नति गरेर सञ्चालनमा ल्याउन समस्या नहुने प्रमुख थापाले बताए। स्थानीय निकायले अहिले नै गल्छीदेखि मलेखुसम्म ट्र्याक खोलेर सञ्चालनमा ल्याएको छ।
त्यसलाई दुई लेन सडकका रूपमा विस्तार गरेर कालोपत्र गर्ने गरी तयारी अघि बढाइएको छ। 'मलेखुबाट विशालटारसम्म पनि ट्र्याक खोल्न समस्या छैन', उनले भने।
नागढुंगा-मुग्लिन सडक सरकारले छ लेन विस्तारको तयारी गरिरहे पनि बजार क्षेत्रमा चार लेनभन्दा विस्तार गर्न नसकिने हुँदा वैकल्पिक रूपमा पारिपट्टि पनि सँगसँगै निर्माण गर्न लागिएको हो।
कतिपय स्थानमा भौगोलिक अवस्थाका कारण चार लेनमा विस्तार गर्न नसकिने अवस्थाले यो सडकलाई विकल्पका रूपमा अघि बढाइएको हो।
हाल पनि ठाउँठाउँमा पुल रहेको र आगामी दिनमा निर्माण हुने पुलले वारिपारि गर्न कुनै समस्या नहुने प्रमुख थापाले बताए। 'यसले एकातिर स्थानीयवासी लाभान्वित हुनेछन् भने अर्कातिर पृथ्वी राजमार्ग भएर हिँड्ने सवारीसाधन पनि पारिबाटसमेत आवतजावत गर्न सक्छन्', उनले भने।
नयाँ संरचनाअनुसार नेपाल सरकारको अधिकार क्षेत्रमा रणनीतिक सडक मात्रै परेसँगै सरकारले सडकको स्तरोन्नतिलाई समेत ध्यान दिन थालेको छ।
सरकारले दुई वर्ष पहिले नै दुई लेनभन्दा कम चौडाइको सडक निर्माण नगर्ने निर्णय गर्दै भएका सडकको विस्तार शुरु गरेको हो। त्रिभुवन राजपथ, पुथ्वी राजमार्ग, धुलिखेल-सिन्धुली-बर्दिवासलगायत सडक विस्तार भइरहेको छ।
तपाईंको ईमेल गोप्य राखिनेछ ।