|

सिरहा :  सिरहाको सखुवा नन्कारकट्टी गाउँपलिकास्थित महेशबारीमा सम्पन्न दोश्रो झण्डा मेला महोत्सव २०७६ मा करिब एक लाखभन्दा बढी आन्तरिक तथा बाह्य पर्यटकले अवलोकन गरेका छन्।

पर्यटन तथा कृषि क्षेत्रको प्रवद्र्धन गर्ने उद्देश्यले गत माघ २३ गतेदेखि फागुन ३ गतेसम्म आयोजना गरिएको १० दिने महोत्सवमा नेपाल तथा छिमेकी देश भारतका करिब एक लाखभन्दा बढीले प्रत्यक्ष अवलोकन गरेको महोत्सव आयोजक समितिका सदस्य महेन्द्र यादवले जानकारी दिए।

‘कला संस्कृति हाम्रो स्वाभिमा, समृद्ध सखुवानन्कारकट्टी हाम्रो पहिचान’ भन्ने नाराका साथ आयोजना गरिएको महोत्सव स्थलमा निर्माण गरिएको १५ फिट अग्लो हनुमानको प्रतिमामाथि ८५ फिट अग्लो ध्वजासहित बनाइएको झण्डा पर्यटकहरुको प्रमुख आकर्षक बनेको थियो।

यसका साथै महोत्सव स्थलमा राखिएको घरायसी आधुनिक औजार र स्थानीयस्तरमा उत्पादन हुने विभिन्न कृषि सामग्रीहरुको प्रदर्शन हुने विभिन्न ५० प्रदर्शनी कक्षको समेत पर्यटकहरुले अवलोकन गरी विभिन्न सामानहरु खरिद गरेको गाउँपालिकाका अध्यक्ष केदरानाथ यादवले जानकारी दिए।

सखुवानन्कारकट्टी गाउँपलिकाको आयोजना सम्पन्न महोत्सवमा पर्यटकहरुको आकर्षणका लागि सांस्कृतिक कार्यक्रम, स्वास्थ्य शिविर, बाल मनोरञ्जनलगायत शिक्षामूलक कार्यक्रमसमेत राखिएको थियो। महोत्सवमा सूर्य चन्द्र अङ्कित नेपालको राष्ट्रिय झण्डालाई अन्तर्राष्ट्रियस्तरमा चिनाउनका लागि झण्डा मेला महोत्सव नामकरण गरिएको थियो।

परम्परागत वेषभूषा तथा संस्कृति जगेर्ना, कृषिलाई आधुनिकीकरण गर्न प्रोत्साहन, हस्तकला तथा घरेलु उत्पादनहरुको प्रदर्शनी र नेपाल सरकारले घोषणा गरेको पर्यटन वर्ष २०२० सफल बनाउन आन्तरिक तथा बाह्य पर्यटन भित्र्याउनका लागि महोत्सवको आयोजना गरिएको गाउँपालिकाका प्रमुख प्रशासकीय अधिकृत राजकुमार दासले जानकारी दिए।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.