यसअघि ५२ बेडको केन्द्रीय आइसियूको अवधारणा भए पनि ३७ वटा आइसियू बेड सञ्चालनमा थिए  भन्ने खबर नयाँ पत्रिका दैनिकमा छ। इन्टरमिडियट बेडको संख्या २० थियो । पुस ०७३ सम्म कान्तिको आइसियूमा १८ बेड थिए । बिरामीको चाप बढेपछि तत्कालीन स्वास्थ्यमन्त्री गगनकुमार थापाले २२ पुस ०७३ देखि आइसियूमा ३४ बेड थप गरेका थिए। यद्यपि अस्पतालले ५२ वटा आइसियू बेड सञ्चालन गर्न सकेन। जम्मा ३७ बेड मात्र सञ्चालित थियो । अस्पताल निर्देशक गणेश राईले डाक्टर, नर्स र बजेटको अभावले सेवा प्रवाहमा गम्भीर समस्या आएको बताए। 

‘मेडिकल अफिसर र आइसियूमा नर्सको चरम अभाव छ। बेडसंख्या थप गर्नुपर्ने समयमा घटाउनुपरेको छ। यसै साता ६ वटा आईसियू बेड घटाएर ३१ मा झारिएको छ’ निर्देशक राईले भने, ‘हामीले स्वास्थ्य तथा जनसंख्या मन्त्रालयलाई पटकपटक सहयोगको अपिल गरेका छौं। तर सहयोग मिलेको छैन। यही अवस्था रहे अस्पतालका सबै सेवा चाँडै बन्द हुन्छ।’