काठमाडौं : हिउँदको वर्षाले जमिन भिजेको र गलिसकेका कारण मनसुन सुरु हुने बित्तिकै ठाउँठाउँमा पहिरो गएको मौसम विज्ञान विभागले जनाएको छ ।
हिउँदमा औषतभन्दा २ सय ३० प्रतिशत बढी वर्षा भएको र मनसुनमा समेत १ सय ३० प्रतिशत बढी वर्षा भएकाले पहिराेका घटनाहरु बढेको विभाग विभागका महानिर्देशक सरजु वैद्यले जानकारी दिए।
उर्जा, जलस्रोत तथा सिंचाई मन्त्रालयमा भएको नियमित पत्रकार सम्मेलनमा महानिर्देशक वैद्यले साउन ९ गतेसम्म मनसुन सक्रिय रहने र त्यसपछि क्रमिक रुपमा वर्षा कम हुने बताए। विगत तीन दिनयता प्रदेश नम्बर २, ५ र गण्डकी प्रदेशमा १ सय ५० देखि २ सय मिलिमिलिटर पानी परेको छ।
मनसुन सुरु भएयता प्रदेश नम्बर १ , २, र ५ मा औषत भन्दा २ सय प्रतिशत बढी पानी परेको छ। विभागले कोसी नदीको चतरा, बागमती नदीको खोकना, नारायणी नदीको देवघाटमा खतराको तह पार गरेको बताएको छ।
नारायणी नदीको देवघाट, अरुणको सिम्ले, तमोरनदी र त्रिवेणी नदीमा जल सतह खतराको तहमा पुगेकोले सतर्कता अपनाउन महानिर्देशक वद्यको भनाइ छ। आज सुस्ता आसपास र तटिय क्षेत्रमा डुबानको जोखिम रहेको उनको भनाइ छ। आगामी तीन दिनसम्म प्रदेश नम्बर १, २, ५, बागमती र गण्डकी प्रदेशका नदीहरुमा बाढीको जोखिम रहेको विभागले जनाएको छ।
विभागले बाढीको पूर्व सूचना समेत प्रदान गरिरहेको छ। मनसुन सुरु भएयता मात्रै ५० लाख १७ हजार २ सय ३३ वटा मोबाइल एसएमएस मार्फत पूर्व सूचना दिइएको विभागले जनाएको छ।
तपाईंको ईमेल गोप्य राखिनेछ ।