काठमाडौं : सर्वोच्च अदालतले कोरोना भाइरस (कोभिड-१९) संक्रमितलाई पनि लोकसेवा आयोगको परीक्षामा सहभागी हुन पाउने वातावरण बनाउन अन्तरिम आदेश जारी गरेको छ।
मानवअधिकार रक्षक सञ्जालका शैलेन्द्र प्रसाद अम्डेकरले लोकसेवा आयोग अनामनगरविरुद्ध दायर गरेको रिटमाथि सुनुवाइ गर्दै सर्वोच्चकी न्यायाधीश सपना प्रधान मल्लको इजलासले यस्तो अन्तरिम आदेश जारी गरेको हो।
'कोभिड-१९ संक्रमित बिरामीले परीक्षामा सहभागी हुन नपाउने भन्ने लोकसेवा आयोगको स्वास्थ्य मापदण्ड कार्यान्वयन नगरी परीक्षार्थीलाई परीक्षामा सहभागी हुने वातावरण बनाउनू', सर्वोच्चले जारी गरेको अन्तरिम आदेशमा भनिएको छ।
सर्वोच्चले नेपालको संविधान २०७४ को धारा १८ ले हरेक नागरिकलाई समानताको हक ग्यारेन्टी गरेको जनाउँदै कुनै पनि व्यक्तिलाई उसको स्वास्थ्य स्थितिका आधारमा विभेद गर्न नपाउने उल्लेख गरेको छ।
त्यसैगरी धारा १७ ले स्वतन्त्रताको हक अन्तर्गत पेशा रोजगार गर्ने स्वतन्त्रता तथा धारा ३३ ले रोजगारीको हकको सुनिश्चितता गरेको स्मरण पनि सर्वोच्चले लोकसेवालाई गराएको छ।
सर्वोच्चले अन्तरिम आदेश दिएसँगै निवेदकको माग बमोजिमको आदेश जारी गर्नु नपर्ने प्रयोजनका लागि त्यसको आधार र कारणसहित महान्यायाधिवक्ताको कार्यालयमार्फत लिखित जवाफसहित १५ दिनभित्र उपस्थित हुन पनि लोकसेवालाई भनेको छ।
लोकसेवाले कोरोना भाइरस संक्रमण तीव्र गतिमा फैलिएपछि संक्रमितलाई सहभागी नगराइ परीक्षा लिने तयारी गरेको थियो। सरकारले नयाँ विज्ञापन खुलाउन तथा रोकिएको परीक्षा सञ्चालनका लागि आग्रह गरेपछि आयोगले परीक्षा लिने तथा नयाँ विज्ञापन खोल्ने तयारी गरेको थियो।
आयोगले आफ्नो तयारीसँगै कोरोना संक्रमित परीक्षामा सहभागी हुन नपाउने गरी मापदण्ड तयार गरेको थियो। परीक्षा सञ्चालन तथा व्यवस्थापनसम्बन्धी मापदण्ड जारी गर्दै आयोगले कोरोना संक्रमित र आइसोलेसनमा बसेका व्यक्तिले परीक्षा दिन नपाउने जनाएको थियो। त्यसैलाई लिएर सर्वोच्चमा रिट परेको हो।
परीक्षार्थी तथा परीक्षामा खटिने जनशक्तिले अनिवार्य मास्क लगाउने, सेनिटाइजर प्रयोग, भौतिक दूरी कायम हुनुपर्ने मापदण्ड तय गरिएको थियो। विद्यार्थी स्वयमले आफूलाई संक्रमण भए-नभएको घोषणा गर्नुपर्ने लगायतका नियम पनि आयोगले बनाएको थियो।
आयोगले एउटा परीक्षा केन्द्रमा एक सय जना परीक्षार्थी राख्ने तयारी गरेको छ। त्यस्तै एउटा बेन्चमा एक जना मात्रै बस्ने गरी एउटा कोठामा २५ परीक्षार्थीलाई सहभागी गराउने तयारी आयोगको छ। कोरोना संकटका कारण २०७७ वैशाखदेखि लोक सेवाको विज्ञापन र परीक्षा रोकिएका छन्।
आयोगले यही असोजमा सहसचिव र उपसचिव, कात्तिकमा प्रशासनको शाखा अधिकृत, मंसिरमा प्राविधिकतर्फको शाखा अधिकृत र त्यसपछि क्रमशः नायव सुब्बा अनि खरिदारको विज्ञापन निकाल्ने भएको छ।
तपाईंको ईमेल गोप्य राखिनेछ ।