काठमाडौं : अर्थमन्त्री विष्णुप्रसाद पौडेल र नेपालका लागि अमेरिकी राजदूत र्याण्डी बेरीबीच आज भेटवार्ता भएको छ। भेटवार्तामा द्विपक्षीय आर्थिक सहयोग, कोभिड-१९ महामारीको नियन्त्रण र सोपछिको आर्थिक पुनरुत्थानमा हुने सहयोगलगायत विषयमा छलफल भएको अर्थमन्त्रीको सचिवालयले जानकारी दिएको छ।
अर्थ मन्त्रालयमा भएको भेटमा अर्थमन्त्री पौडेलले नेपाल अमेरिकाबीचको सम्बन्ध धेरै पुरानो भएको स्मरण गर्दै अमेरिकाले नेपालको विकासमा निरन्तर गर्दै आएको सहयोगका लागि धन्यवाद दिएका छन्।
राजदूत बेरीले अमेरिकाबाट प्राप्त हुने सहायता कोरोना भाइरस नियन्त्रणमा केन्द्रित गरेकामा नेपाललाई धन्यवाद दिँदै अमेरिकाले आगामी दिनमा नेपाललाई दिने सहयोगलाई निरन्तरता दिइने प्रतिबद्धता व्यक्त गरेको मन्त्रालयले जनाएको छ।
भेटमा अमेरिकी परियोजना मिलेनियम च्यालेन्ज कर्पोरेशनबारे कुरा भए नभएकोबारेमा अर्थमन्त्रालय मौन छ। अमेरिकी परियोजना पारित गर्ने गरी नेपालमा सत्ता-प्रतिपक्ष तयार भइसकेका छन्।
तपाईंको ईमेल गोप्य राखिनेछ ।