बर्दिया : नेकपा प्रचण्ड–माधव समूह स्थायी समिति सदस्य वर्षमान पुन अनन्तले निर्वाचन घोषणापछि कामचलाउ हैसियतमा सीमित भइसकेको ओली सरकारले ‘फुलफेज’ सरकारका रुपमा काम गरिरहेको भन्दै आपत्ति जनाएका छन्।
आफैं निर्वाचन घोषणा गर्ने र पूर्ण अधिकार रहेको दाबी गर्ने प्रधानमन्त्री केपी ओली र उनका मन्त्रीहरु अलोकतान्त्रिक भएका पनि उनले टिप्पणी गरे। संविधानमै प्रतिनिधिसभा सदस्य नरहेको व्यक्ति प्रधानमन्त्री हुन नसक्ने स्पष्ट उल्लेख भएको चर्चा गर्दै उनले ओलीले पूर्ण अधिकार छ भन्ने अनैतिक र गैरसंवैधानिक भएको टिप्पणी पनि गरे।
‘कथित चुनाव घोषणापछि राजीनामा दिएको भए र राष्ट्रपतिले कामचलाउको चिठी दिएको भए वैधानिकताको सानो त्यान्द्रो भए पनि बाँकी रहन्थ्यो’, पुनले भने , ‘प्रतिनिधिसभा सदस्य नरहेको व्यक्ति प्रधानमन्त्री हुनै मिल्दैन, केपी ओली अवैधानिक प्रधानमन्त्री हो।’
मन्त्री पुनले कामचलाउ सरकारले संविधान र कानुनविपरीत दिएका आदेश पालना नगर्न सुरक्षा निकाय र कर्मचारीलाई आग्रह पनि गरे। एउटा गुट र व्यक्तिका लागि जे–जे भन्यो त्यही गर्दा पछि पछुताउनुपर्ने अवस्था आउन सक्ने उनको भनाइ छ।
‘सुरक्षा निकाय र प्रशासनका कर्मचारीलाई कामचलाउ सरकारले दिउका निर्देशन संविधानसम्म छ कि छैन? कानूनसम्मत छ कि छैन? जनअभिमतअनुसार छ कि छैन? भन्ने विचार गरेर मात्र गर्न म अनुरोध गर्छु’, नेकपाको प्रचण्ड–माधव नेपाल पक्षका अगुवा कार्यकर्ता भेला ताथ प्रशिक्षणलाई आइतबार बर्दियामा सम्बोधन गर्दै पुनले भने, ‘एउटा गुटकका लागि, एउटा व्यक्तिका लागि भोलि पछुताउनुपर्ने अवस्था नआओस्। म अहिले नै सचेत गराउन चाहन्छु, सुझाव दिन चाहन्छु।’
यस्तै पुनले संसद विघटनपछि गरिएका सबै काम असंवैधानिक हुने भन्दै संसद पुनर्स्थापनापछि ती सबै सच्याइने बताए। प्रतिनिधिसभा विघटनपछि गरिएका सबै नियुक्ति, सरुवा र महत्वपूर्ण निर्णय पुनर्स्थापनापछि तत्काल सच्याइनेछ। त्यसैले खबरदार त्यसप्रकारका गैरकानुनी कामहरु नहोऊन्’, पुनले भने।
यस्तै आइतबारै बाँकेमा भएको कार्यकर्ता भेलालाई सम्बोधन गर्दै नेता पुनले प्रधानमन्त्री केपी ओलीले संविधान मिच्नुका साथै जनताको अभिमतमाथि कुठाराघात गरेका पनि टिप्पणी गरे।
असंवैधानिक रुपमा संसद विघटन गर्ने ओलीको कदमले लोकतन्त्रमाथि चुनौती खडा भएको तथा मुलुकलाई प्रतिगमनतिर धकेलिएकाले आफूहरु बाध्य भएर संघर्षमा उत्रिएको पुनको भनाइ थियो। ।’
तपाईंको ईमेल गोप्य राखिनेछ ।