काठमाडौं : नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले केपी शर्मा ओलीको पत्तासाफ गरेर कांग्रेस सभापति शेरबहादुर देउवालाई प्रधानमन्त्री बनाउने बताएका छन्।
शुक्रबार एक टेलिभिजनलाई अन्तर्वार्ता दिँदै अध्यक्ष प्रचण्डले यस्तो बताएका हुन्। प्रधानमन्त्री अोलीले संसदमा फेस गर्ने भनेकाले आफूहरूले कांग्रेस र जसपासँग मिलेर अविश्वासको प्रस्तावमार्फत ओलीलाई हटाउने प्रचण्डको भनाइ थियो। साथै उनले देउवा ओलीसँग सहकार्य गर्नै नसक्ने ठोकुवा गरे।
‘मेरो प्रधानमन्त्रीको दाबी गर्दिनँ। दुई चार दिनभित्रै अन्तिम चरणमा पुग्छौं। शेरबहादुरजीलाई प्रधानमन्त्री बनाउँछु। ओलीको पत्तासाफ गर्छु, म प्रधानमन्त्री बन्दिन, देउवालाई बनाउँछु’ उनले भने।
अध्यक्ष प्रचण्डले आफूले सत्ताका लागि सम्झौता नगरेको बताउँदै उनले नेपाली कांग्रेस र जनता समाजवादी पार्टीसँग सहकार्य गरेर जाने बताए। एउटै मुद्दामा समर्थन रहेकाले कांग्रेस र समाजवादी आफूहरूसँग सहकार्य गर्ने प्रचण्डले दाबी गरे।
ओली प्रवृत्तिसँग सम्झौता गरेर एकता सम्भव नभएको भन्दै प्रचण्डले अोलीमा सर्वोच्चले यत्रो फैसला गर्दा पनि नैतिकताको ‘न’ समेत नभएको बताए। ‘ओलीजी मलाई ध्वस्त बनाउँछु भन्दै हिँड्नुभएको छ’ प्रचण्डले भने,‘अब उनीसँग कसरी एकता हुन्छ ? अब उहाँ प्रतिगमनकारी चारधाराको मानिस हुनुभयो।’
तपाईंको ईमेल गोप्य राखिनेछ ।