- मधुकर खड्का
मेरो एक्लो जुलुसमा
तिमी छैनौ
तिम्रा झण्डाहरू छैनन्
तिमीले लगाउने नाराहरू छैनन्,
जिन्दावाद र मुर्दावाद त छँदै छैन
मेरो एक्लो जुलुसमा
अघिपछि पुलिसहरू छैनन्
पत्रकारहरू पनि छैनन्
छैनन् गालीका बर्षाहरू
न त छन्-
उन्माद चढेका कार्यकर्ताहरू
त्यसैले छैन सडकमा जाम
मेरो एक्लो जुलुस
अघि बढिरहेछ समयको बक्ररेखा झेल्दै
मेरा आफ्नै मागहरू छैनन्
छैन विरोध कार्यतालिका
र पनि, सडकहरूमा
म एक्लै एक्लै जुलुस लगाइरहेछु
मेरो जुलुसमा म एक्लो देखिन्छु
तर म एक्लो छैन
छन् दु:खीका आँशुहरू
भत्किएका सपनाका लामहरू
तीनपुस्ते विश्वासघातका हिसाबहरू
तिनले दिएका आश्वासनका भकारीहरू
यहाँ हरेक जुगमा हरेकचोटि
तमाम मान्छेहरूसँग
एउटा जुलुस
एउटा मान्छे
आन्दोलन गरिरहन्छ !
तपाईंको ईमेल गोप्य राखिनेछ ।