गुल्मी : रेसुंगा वन क्षेत्रमा चैत २५ गतेदेखि लागेको डढेलो अझै नियन्त्रणमा आएको छैन। आगो नियन्त्रणमा लिन नेपाली सेना‚ सशस्त्र प्रहरी र नेपाल प्रहरीको टोली परिचालन भएको जिल्ला प्रहरी कार्यालय गुल्मीका प्रहरी नायब उपरीक्षक पुरुषोत्तम पाण्डेले जानकारी दिए।
सल्लाको वन रहेकाले आगोले कुन मोड लिन्छ भन्ने थाहा नहुने‚ डढेलो लागेको क्षेत्रमा पानीको समस्या र भीर भएकाले पनि आगो नियन्त्रणमा लिन समस्या भएको पाण्डेले बताए। रेसुंगा क्षेत्रमा रहेको एनसेल‚ रेडियो नेपालको टावर र भ्युटावरलाई फायर लाइन खोली सुरक्षित गरिएको छ।
डढेलो कसरी लाग्यो भन्ने जानकारी नभएको र वनमा आगो लगाउने व्यक्तिको खोजी जारी रहेको जिल्ला प्रहरी कार्यालय गुल्मीले जनाएको छ।
वन क्षेत्र‚ खरबारीमा आगो लगाउँदा नयाँ घाँस पलाउने‚ दाउरा र मल पनि हुने भन्दै स्थानीयले डढेलो लगाउने गरेको डिभिजन वन कार्यालय गुल्मीले जनाएको छ। वन क्षेत्रमा आगो लगाउने व्यक्तिलाई वन ऐन २०७६ अनुसार ६० हजार रुपैयाँसम्म जरिवाना‚ तीन वर्षसम्म कैद वा दुवै हुने व्यवस्था छ। वन क्षेत्रमा आगो लगाउने व्यक्ति समाजका व्यक्तिहरुलाई थाहा भए पनि सूचना नदिने कारणले समस्या भएको गुल्मी जिल्लाकी प्रमुख जिल्ला अधिकारी रुद्रादेवी शर्माले बताइन्।
तपाईंको ईमेल गोप्य राखिनेछ ।