काठमाडौं : एमाले नेता माधवकुमार नेपालले आफ्नै पार्टीका प्रधानमन्त्री केपी ओलीलाई विश्वासको मत नदिनु देश, जनता र पार्टीप्रतिको निष्ठा भएको दाबी गरेका छन्।
उनले संसद्मा ओली विश्वासको मत लिन असफल भएपछि विज्ञप्ति जारी गर्दै ओलीलाई एकताका लागि अपिल पनि गरेका छन्।
सोमबार साँझ जारी गरेको विज्ञप्तिमा उनले प्रधानमन्त्री ओलीका गलत क्रियाकलापको विरोध र प्रतिवाद गर्दै देश, जनता र लोकतन्त्रको भविष्य सुरक्षित गर्न आ–आफ्नो स्थानबाट योगदान गर्नु सबै देशभक्त, लोकतन्त्रप्रेमी राजनीतिकर्मी तथा जनसमुदायको कर्तव्य हुने भएकोले सोहीअनुरुप हामीले प्रधानमन्त्री केपी ओलीलाई विश्वासको मत नदिने र प्रतिनिधि सभाको बैठकमा अनुपस्थित हुने निर्णय गरेको उल्लेख गरेका छन्।
यो निर्णय हाम्रो देश, जनता र पार्टीप्रतिको निष्ठाको द्योतक भएको नेपालले लेखेका छन्। उनले प्रधानमन्त्री र पार्टी अध्यक्ष रहेका केपी ओलीलाई फेरि पनि देश, जनता र पार्टीप्रति जिम्मेवार भए सोच्न आग्रह गरेका छन्।
नेता नेपालले वक्तव्यमा देशको संविधान र पार्टीको विधानको सम्मान गर्न, विगतका गल्तीलाई सच्याउन, पार्टी एकताका लागि अगाडि सारेका कुराको सम्बोधन गर्न र राष्ट्रिय तथा पार्टीको एकतालाई नखल्बल्याउन आग्रह पनि गरेका छन्।
तपाईंको ईमेल गोप्य राखिनेछ ।