सिन्धुपाल्चोक : शनिबारदेखि मेलम्ची खोलामा आएको बाढीले हालसम्म ६० घर टहरा बगाएको छ। हेलम्बुका किउल, चनौटे, ग्याल्थुमलगायत क्षेत्रमा मात्र ५५ र तालामाराङ तथा मेलम्चीमा पाँच घरटहरा बगाएको जिल्ला प्रहरी कार्यालयका प्रहरी उपरीक्षक राजन अधिकारीले जानकारी दिए।
अधिकारीका अनुसार गत असार १ गते आएको भीषण बाढीले लेदो भरिएका घर शनिबार रातिको बाढीले बगाएको हो। ती घर खाली थिए। उनका अनुसार चनौटे ग्याल्थुम र ढुंग्रे बजार जोखिममा छन्। हेलम्बु गाउँपालिका–४ को ढुंग्रे बजार पनि जोखिममा रहेकाले प्रहरी र सेनाले स्थानीयवासीका घरबाट सामान सार्न सहयोग गरिरहेका अधिकारीले बताए। जोखिम कायमै रहेकाले सजग रहन सम्पूर्णमा आग्रह गरिएको छ।
बाढी चनौटे बजार भएर बगिरहेको छ। यसअघिको बाढी पनि यही बजारबाट बगेको थियो। खोलालाई पुरानै धारमा फर्काएर बजार जोगाउन प्रयास भइरहेको थियो। बाढीले मेलम्ची नगरपालिका–१२ मा रहेको मध्यपहाडी लोकमार्ग तथा मेलम्ची, इन्द्रावती, चौतारा र पाँचपोखरीलाई जोड्ने एकमात्र बाहुनेपाटी पुल जोखिममा परेको छ। यसअघि गत असार १ गतेको बाढीबाट जोगिएको बाहुनेपाटी बजार अहिले भने जोखिममा छ।
त्यस्तै‚ बाढीले चार गोठ, एक पक्की पुल र एक झोलुङ्गे पुल बगाएको छ। एक फर्निचर उद्योग र एक रेडियोको भवन पनि बाढीले बगाएको छ। यस्तै‚ बाढीले हेलम्बुका दुई पक्की पुल र दुई घरको अवस्था अज्ञात छ। हेलम्बु–२ को कात्तिके खोलामा रहेको पक्की पुल, हेलम्बुका वडा नम्बर १ र २ जोड्ने घट्टे खोलामाथिको पक्की पुलको अवस्था थाहा हुन नसकेको हो।
तपाईंको ईमेल गोप्य राखिनेछ ।