काठमाडौं : गृहमन्त्री बालकृष्ण खाँणले बाँकेका दुई महिलाका हत्यारालाई तत्काल पक्राउ गरी कारबाही गर्ने प्रतिवद्धता जनाएका छन्।
गृहमन्त्री खाँणले बाँकेकी नकुन्नी धोबी र निर्मला कुर्मीको हत्यामा संलग्नहरूलाई तत्काल अनुसन्धान गरी कानुन बमोजिम कडा कारबाही गर्ने प्रतिवद्धता जनाएका हुन्। आइतबार सिंहदरबारमा पुगेर महिला अधिकारकर्मीहरूले सो घटनाका दोषीमाथि कडा कारबाही गर्न गृहमन्त्री खाँणलाई ज्ञापन पत्र बुझाएका थिए।
त्यसक्रममा गृहमन्त्री खाँणले पीडितलाई न्याय दिन सरकार प्रतिवद्ध रहेको बताए। उनले भने, ‘नेपाली जनताको जीवन रक्षा गर्ने राज्यको दायित्व हो। कुनै पनि नेपाली जनताले अनाहकमा जीवन गुमाउन नपरोस् त्यसमा हामी गम्भीर छौं। र जनताको जीवन रक्षाका लागि महिला दिदीबहिनीहरूको रक्षाका लागि राज्य र सरकार गम्भीर छ।
घटनाहरूको बारेमा तत्काल अनुसन्धान पनि हुन्छ। कानुनमा भएको व्यवस्थाको रक्षा गर्ने, कानुनको रक्षा गर्ने दायित्व पनि सरकारको हो। कानुन बमोजिम नै कारबाही हुन्छ।’ गृहमन्त्री खाँणले सरकारले महिलामाथि हुने हत्या, हिंसालगायतका अपराधिक घटना नियन्त्रण गर्न गम्भीर भएर लागिपरेको दाबीसमेत गरे।
त्यसक्रममा महिला अधिकारकर्मीहरूले पीडितको न्यायका लागि दोषीमाथि कडा कारबाही गर्न सरकारको गम्भीर ध्यानाकर्षण गराएका थिए। महिला सुरक्षा दबाव समूहकी सुशीला श्रेष्ठले दोषीमाथि कडा कारबाही गरी पीडितलाई न्याय दिन सरकारलाई दबाव दिनु परेको बताइन्।
उनले सरकारले सो घटनाको अनुसन्धान गरी दोषीमाथि कारबाही गर्न कुनै चासो नदिएको भन्दै आक्रोशसमेत व्यक्त गरिन्।
तपाईंको ईमेल गोप्य राखिनेछ ।