मकवानपुर : असोजको अन्तिम सातामा परेको अविरल वर्षाका कारणले बागमती प्रदेशको सात जिल्लाका दुई हजार हेक्टरभन्दा बढी क्षेत्रफलमा लगाइएको धानबालीमा क्षति पुगेको बागमती प्रदेशको भूमि व्यवस्था, कृषि तथा सहकारी मन्त्रालयको प्रारम्भिक एक अध्ययनले जनाएको छ।
साथै दशैंलगत्तै सरकारी कार्यालय खुलेकाले कृषि प्राविधिक कर्मचारी परिचालन गरिएको र थप धानबाली क्षतिको विवरण आउन बाँकी रहेको बताइएको छ। मन्त्रालयको प्रारम्भिक अध्ययनअनुसार बागमती प्रदेशको मकवानपुर, चितवन, सिन्धुली, रामेछाप, काभ्रेपलाञ्चोक, नुवाकोट र धादिङ जिल्लामा अविरल वर्षाका कारणले धानबालीमा भएको क्षतिको विवरण आएको जनाइएको छ। थप विवरण आउँन बाँकी रहेको छ।
मन्त्रालयका सूचना अधिकारी अनुप अधिकारीका अनुसार मकवानपुरमा १००, चितवनमा एक हजार ६३५, सिन्धुलीमा ९०, रामेछापमा ३०, नुवाकोटमा ३६, काभ्रेमा १५ र धादिङमा ९८ हेक्टर क्षेत्रफलमा लगाइएको धानबालीमा क्षति पुगेको हो।
बागमती प्रदेशको सात जिल्लामा तीन करोड ८२ लाख २० हजार रुपैयाँ मूल्य बराबरको धानबालीमा प्रारम्भिक क्षति भएको अनुमान छ। प्रदेशको कृषि मन्त्रालयले एक करोड रुपैयाँसम्म विपद्का लागि राहत दिन बजेट छुट्याएको छ। मन्त्रालयलले क्षतिको पूरा विवरण आएपछि धानबालीमा लगाएको लागत रकम हिसाब गर्ने र सोहीअनुसार क्षतिपूर्तिका लागि लागतको २० प्रतिशतसम्म राहत दिने बताइएको छ।
प्रदेशका १३ जिल्लामा ९४ प्रतिशत धानखेती गरिएको थियो। बागमती प्रदेशको स्थानीय तहका कृषि प्राविधिक, मन्त्रालय मातहतका कृषि निर्देशलाय र स्थानीय तहका कर्मचारीबाट क्षतिको विवरण सङ्कलन भइरहेको सूचना अधिकारी अधिकारीले बताए।
तपाईंको ईमेल गोप्य राखिनेछ ।