|
चैनपुर-सेती जलविद्युत आयोजनाको प्रस्तावित निर्माणस्थल। तस्वीर : टेकसिंह धामी

धनगढी : साढे ३६ अर्ब लागत अनुमान गरिएको बझाङको चैनपुर–सेती जलविद्युत आयोजना अध्ययनमा मात्र सीमित भएको छ।

२ सय १० मेगावाटको आयोजनाको प्रारम्भिक अध्ययन यसअघि नै भइसकेको छ। ४ वर्ष लगाएर सम्भाव्यता अध्ययन गरिएको आयोजना निर्माणले अझै गति लिन सकेको छैन।

आयोजनाको दोस्रो चरणको अध्ययन अघि बढाइएको दाबी गरिए पनि खासै काम हुन सकेको छैन। बझाङको साइपाल गाउँपालिकाको काँडामा बाँध बाँधेर तलकोट गाउँपालिकामा आयोजना निर्माण गर्न नेपाल विद्युत प्राधिकरणले प्राथमिकतामा राखेको भएपनि अध्ययनबाहेक केही काम हुन सकेको छैन।

५ वर्षभित्र निर्माण सक्ने लक्ष्य रहेको सो आयोजना अध्ययनमा मात्र सीमित भएको स्थानीय गुनासो गर्छन्।

विस्तृत इन्जिनियरिङ ढाँचा तयार, खरिद र निर्माण (इपिसी) मोडलमा निर्माण गर्ने गरी पहुँच सडक निर्माण, जग्गा अधिग्रहणलगायत अघि बढेको चैनपुर–सेती जलविद्युत आयोजनाले जनाएको छ।

१३ किलोमिटर सुरुङमार्ग सहितको आयोजना अघि बढाउन दोस्रो चरणको अध्ययन भइरहेको आयोजना प्रमुख अनिलभक्त श्रेष्ठले बताए।

‘अन्य आयोजनाको तुलनामा थोरै लागतमा उच्च प्रतिफल दिने आयोजना भनेकै चैनपुर–सेती जलविद्युत हो। अहिले दोस्रो चरणको अध्ययन भइरहेको छ,’ उनले भने।

आयोजनाले दैनिक ६ घण्टा २ सय १० मेगावाट विद्युत् उत्पादन गर्नसक्ने भएकाले निर्माण अघि बढाइएको आयोजना प्रमुख श्रेष्ठले बताए।

आयोजनाको बाँध क्षेत्रमा बस्ती नभएको र पावर हाउस बन्ने ठाँउमा सानो बस्ती भएकाले आयोजना निर्माणका लागि २ सय ३० रोपनी निजी जग्गा आवश्यक रहेको उनले बताए।

आयोजनाको वातावरणीय प्रभाव मूल्यांकन प्रतिवेदन तयार पारेर विद्युत् विकास विभागमार्फत् स्वीकृतिका लागि वन मन्त्रालयमा पठाइसकिएको छ।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.