झापा : जिल्लामा पछिल्लो समय जुवातास खेलिरहेको अवस्थामा नगदसहित पक्राउ पर्ने क्रम बढेको छ। शनिबार मात्र तास खेलिरहेका अवस्थामा दमक नगरपालिकाको रातो भाले सेकुवा कर्नरबाट ६ जनालाई प्रहरीले दुई लाख नगदसहित नियन्त्रणमा लिएको थियो।
त्यस्तै, इलाका प्रहरी कार्यालय दमकले दमक नगरपालिका २ बस्ने मोहनकुमार तामाङको घरमा तास खेलिरहेका अवस्थामा आइतबार साँझ फेरि ६ जनालाई पक्राउ गरेको छ।
प्रहरी कार्यालय झापाले दिएको जानकारीअनुसार पक्राउ पर्नेमा घरधनी तामाङ, सोही स्थानका ३८ वर्षीय पूर्णप्रसाद सिवाकोटी, ३० वर्षीय विनोद श्रेष्ठ, ३७ वर्षीय दिलबहादुर श्रेष्ठ, सोही नगरपालिका ३ का ३४ वर्षीय सुरेन्द्र नेम्वाङ र कमल गाउँपालिका ६ का ४१ वर्षीय दुर्गाबहादुर राई छन्।
उनीहरूलाई आइतबार बेलुका पक्राउ गरेको प्रहरीले जनाएको छ। प्रहरी टोलीले उनीहरूको साथबाट तीन बुक तास र नगद एक लाख २० हजार ५०० बरामद गरेको जनाएको छ।
पक्राउ परेका उनीहरूलाई इलाका प्रहरी कार्यालय दमकमा राखेर थप अनुसन्धान गरिरहेको प्रहरीले जनाएको छ।
तपाईंको ईमेल गोप्य राखिनेछ ।