|

काठमाडाैं : प्रधानमन्त्री शेरबहादुर देउवाले कोभिड–१९को सङ्क्रमणबाट जोगिन कोभिड–१९ विरुद्धको खोप र स्वास्थ्यका मापदण्ड पालनाका साथै सचेतना पनि आवश्यक रहेको बताएका छन्।

उनले कोभिड–१९ को नयाँ भेरियन्टले हाल जनस्वास्थ्यमा समस्या उत्पन्न गरेको उल्लेख गर्दै यसबाट बच्न कोभिड–१९ विरुद्धको खोप लगाउन, स्वास्थ्य सुरक्षाका मापदण्ड पालना गर्न, भौतिक दूरी कायम गर्न, समय समयमा हात धुनेलगायतका सचेतनाको आवश्यकता औँल्याए। 

विपद् जोखिम न्यूनीकरण तथा व्यवस्थापन राष्ट्रिय परिषद्को आज नवौँ बैठकमा प्रधानमन्त्री देउवाले कोभिड–१९को सङ्क्रमण रोकथामबारे जनतामा सचेतना जगाउन मिडियाको महत्वपूर्ण भूमिका रहेको बताउँदै यसमा सहयोग गर्न आग्रह गरे।

उनले कोभिड–१९ बाट जोगिने सचेतनाबारे देशभरि अभियान चलाउन सम्बन्धित निकायलाई निर्देशन दिँदै यसमा सहयोग गर्न सबै सङ्घसंस्था तथा राजनीतिक दलहरूलाई आग्रह गरे। उनले बालबालिकालाई पनि कोभिड–१९ विरुद्धको खोप लागाउनुपर्ने देखिएको भन्दै त्यसका लगि आवश्यक प्रबन्ध गर्न निर्देशन दिए।

कोभिड–१९को नयाँ भेरियन्ट ओमिक्रोनको सङ्क्रमणबाट मृत्युदर कम भए पनि यो द्रूत गतिमा फैलिएकोप्रति सजग गराउँदै उनले भने, 'खुला सिमानाबाट मानिसको आवतजावतले डरलाग्दो अवस्था आउन सक्छ, जनताको ज्यान जोगाउनु सरकारको पहिलो कर्तव्य हो, यसमा सबै लागौँ।'

सिमानामा कोभिड–१९ को पर्याप्त मात्रामा परीक्षण गर्न र आवश्यक मात्रामा होल्डिङ सेन्टर तत्काल स्थापना गर्नुपर्ने बताउँदै उनले जनताको जीवन रक्षाका लागि आवश्यक मात्रामा कोभिड–१९ विरुद्धको बुष्टर डोज तत्काल खरिद गरी सहजताका साथ मुलुकभर वितरण गर्न निर्देशन दिए।

प्रधानमन्त्री देउवाले केही महिनाअघि आएको बेमौसामी वर्षाले मुलुकभर भएको जनधनको क्षतिको आवश्यक राहत र क्षतिपूर्तिको काम हुन नसकेको बताउँदै त्यसमा ध्यान दिनसमेत सम्बन्धित निकायलाई निर्देशन दिए। 

कार्यक्रममा प्रमुख प्रतिपक्षी दल नेकपा (एमाले) का उपाध्याक्ष सुवास नेम्वाङले कोभिड–१९को रोकथाम र नियन्त्रणमा सरकारले थप सक्रिय भएर काम गर्नुपर्ने बताउँदै यसमा आफ्नो दलले आवश्यक सहयोग गर्ने प्रतिबद्धता व्यक्त गरे।

उनले कोभिड–१९ विरुद्धको खोपको उचित व्यवस्थान गरी चाँडो भन्दा चाँडो सबै जनतालाई सहजरूपमा आवश्यक मात्रामा खोप लगाउन आग्रह गर्दै सिमानामा परीक्षण र होल्डिङ सेन्टरको पर्याप्त सुविधाको व्यवस्थापन गर्न, स्वास्थ्यकर्मीको स्वास्थ्यमा ध्यान दिन, कोरोना बिमाको भुक्तानीको समस्या समाधान गर्न सरकारको ध्यानाकर्षण गराए। 

कार्यक्रममा राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी अधिकृत अनिल पोखरेलले विपद्‍बाट क्षति भएका संरचनाको पुनःनिर्माणको अवस्था बारे प्रस्तुति दिएका थिए भने स्वास्थ्य तथा जनसङ्ख्या मन्त्रालयका सचिव डा रोशन पोखरेलले कोभिड–१९को वर्तमान अवस्था र यसको रोकथाम तथा नियन्त्रणमा सरकारले गरेका कामका बारेमा प्रस्तुति दिएका थिए। 

कार्यक्रममा भर्चुअल माध्यमबाट जोडिएका शहरी विकासमन्त्री रामकुमारी झाँक्रीले आफ्नो मन्त्रालयका काम कारबाही र सातै प्रदेशका मुख्यमन्त्रीहरूले आफ्नो प्रदेशमा कोभिड–१९को वर्तमान अवस्था र यसको रोकथाम तथा नियन्त्रणमा गरेका प्रयासबारे अवगत गराएकी थिइन्।

कार्यक्रममा गृहमन्त्री बालकृष्ण खाँण, सञ्चार तथा सूचना प्रविधिमन्त्री ज्ञानेन्द्रबहादुर कार्की, अर्थमन्त्री जनार्दन शर्मा, कृषि तथा पशुपन्छी विकासमन्त्री महिन्द्रराय यादव, वन तथा वातावरणमन्त्री रामसहायप्रसाद यादव, युवा तथा खेलकुदमन्त्री महेश्वरजङ्ग गहतराज, मुख्यसचिव शङ्करदास बैरागी, सुरक्षा निकायका प्रमुखलगायत सहभागी थिए।  

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.