काठमाडौं : पत्रकारसँग सम्बन्धित विभिन्न संघ/संगठनले बिहीबार मृत्यु भएका पत्रकार लालबहादुर विश्वकर्मा (एलबी)को उपचारमा लापरवाही गर्ने अस्पताललाई कारबाही गर्नुपर्ने माग गरेका छन्।
श्रमजीवी पत्रकार संघ नेपालले नयाँबानेश्वरस्थित निजामती कर्मचारी अस्पताल (सिभिल अस्पताल)मा उपचारका लागि पुर्याइएका पत्रकार विश्वकर्मालाई कोरोना परीक्षणबिना उपचार नहुने भनेर लापरवाही गर्दा मृत्यु भएको भन्दै अस्पताललाई कारबाहीको माग गरेको छ। संघले विज्ञप्ति जारी गरी घटनाका दोषीउपर छानविनसहित कडा कारबाही गर्नुपर्ने र पीडित परिवारलाई उचित क्षतिपूर्तिको व्यवस्था गर्न अनुरोधसमेत गरेको छ।
त्यसैगरी राष्ट्रिय दलित पत्रकार संघ नेपालले पत्रकार विश्वकर्माले सहज उपचार नपाउँदा निधन भएको जनाउँदै उक्त विषयमा तत्काल छानबिन गरी उपचारमा लापरवाही गर्ने अस्पताललाई कारबाही गर्नुपर्ने माग गरेको छ।
| अब उनी जीवित छैनन् |
टिभी टुडे टेलिभिजनमा कार्यरत पत्रकार विश्वकर्माको स्वास्थ्यमा अचानक समस्या देखिएपछि बुधबार राति ललितपुरस्थित पाटन अस्पताल पुर्याएपछि उपचारकै क्रममा बिहीबार बिहान ३ बजे निधन भएको थियो। २६ वर्षीय विश्वकर्माका श्रीमती र तीन वर्षीय एक छोरा छन्।
अछामको रामारोशन निवासी विश्वकर्मा पछिल्लो समय काठमाडौंमा रही पत्रकारितामा सक्रिय थिए। उनले इमेज टेलिभिजन, जनता टेलिभिजन, ईकागज डटकमलगायतमा काम गरेका थिए।
तपाईंको ईमेल गोप्य राखिनेछ ।