|

झापा : दोस्रो चरणको स्थानीय तह सदस्य निर्वाचनमा झापा जिल्लाका पालिकाहरुमा निर्वाचित मेयर तथा अध्यक्षहरूलाई शपथ ग्रहण गराइएको छ। जिल्लाका १५ वटा पालिकामध्ये पहिलो चरणमा ११ वटा पालिकाका मेयर तथा अध्यक्षहरूलाई सोमबार बिहान झापा जिल्ला अदालतमा शपथ ग्रहण गराइएको छ।

निर्वाचित मेयर तथा अध्यक्षहरूलाई मुख्य निर्वाचित अधिकृत तथा झापा जिल्ला अदालतका न्यायाधीश गिरिराज गौतमले शपथ ग्रहण गराएका छन्। शपथ ग्रहण गर्ने मेयरहरू भद्रपुर नगरपालिकाका गणेश पोखरेल, बिर्तामोड नगरपालिकाकी पवित्रा महतारा, कनकाई नगरपालिकाका राजेन्द्रकुमार पोखरेल, दमक नगरपालिकाका राम थापा, अर्जुनधारा नगरपालिकाका बलदेव सिंह गोम्देन तामाङ, शिवसताक्षी नगरपालिकाका मेघाहाङ थोप्रा रहेका छन्।

त्यस्तै शपथ ग्रहण गर्ने अध्यक्षहरू बुद्धशान्ति गाउँपालिकाका मनोज प्रसाईं, हल्दीबारी गाउँपालिकाका रवीन्द्र लिङ्देन, बाह्रदशी गाउँपालिकाका देवेन्द्र प्रसाद चौँलागाई, कचनकवल गाउँपालिकाका कालेन्द्रप्रसाद सिंह राजवंशी, झापा गाउँपालिकाका जयनारायण साह रहेका छन्।

शपथ लिएका पालिकाका मेयर तथा अध्यक्षहरूले आ–आफ्नो पालिकामा निर्वाचित उपमेयर, वडा अध्यक्ष र सदस्यहरूलाई शपथ खुवाउँदै आजै कतिपय पालिकाहरुमा पदभार ग्रहण गराउने कार्यक्रम रहेको जनाइएको छ।

यता आइतबार राति मात्रै गौरीगञ्ज गाउँपालिका, कमल गाउँपालिका, गौरादह नगरपालिकाको परिणाम सार्वजनिक भएको र  मेचीनगर नगरपालिकाको मतगणना अझै जारी रहेकोले चार पालिकाका मेयर तथा अध्यक्षहरूलाई दोस्रो चरणमा शपथ ग्रहण गराइने मुख्य निर्वाचित अधिकृत गौतमले जानकारी दिए।

मुख्य निर्वाचित अधिकृत गौतमको अध्यक्षतामा भएको शपथ ग्रहण कार्यक्रममा झापा जिल्ला समन्वय समितिका अध्यक्ष सोमनाथ पोर्तेल, झापाका प्रमुख जिल्ला अधिकारी छविलाल रिजाल लगायतले शुभकामना मन्तव्य व्यक्त राखेका थिए।
 
 

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.