|

विराटनगर : एक वर्षीया बालिकालाई अपहरण गर्ने दुईजनालाई प्रहरीले पक्राउ गरेको छ।

उनीहरूले विराटनगरबाट  बालिकालाई अपहरण गरेर भारतमा लुकाएर १५ लाख फिरौती माग्ने योजना बनाएको मोरङ प्रहरीले  जनाएको छ।

पक्राउ पर्नेमा विराटनगर-५ की अनु साह र विराटनगर-६ रामपुर बस्ने २७ वर्षीय रवीन्द्रकुमार साह रहेका मोरङ प्रहरी प्रमुख एसपी शान्तिराज कोइरालाले बताए। उनका अनुसार रवीन्द्र अपहरणका मुख्य योजनाकार हुन्।

दुईजनाको मिलेमतोमा बुढीगंगा–१ बस्ने दीपेन यादवकी १ वर्षकी छोरी निकिशा यादवलाई विराटनगर १२ रोडशेष चोकछेउबाट गत साउन २ गते बिहान ९ बजे अपहरण गरेको एसपी कोइरालाले बताए।

यसरी भएको थियो घटना
यादव र अनुको २ वर्षदेखि आपसमा चिनजान थियो। त्यही अनुसार अनुले दीपेन यादवलाई बच्चा हेर्नु छ भन्दै बोलाएकी थिइन्। अनुको भनाइ मानी यादवले पनि आफ्नी एक वर्षे बालिकालाई कारमा लिएर अनुलाई बच्चा देखाउन रोडशेष ल्याएका थिए। क्रममा चिया खाने निहुँ बनाएर अनुले दीपेनको आँखा छली बच्चा लिएर भागेकी थिइन्।

भारतीय गाडी रिजर्भ गरी दरभंगा पठाए
अनुले बच्चा लिएर आउँदा रवीन्द्र साह मोटरसाइकल लिएर तम्तयार बसेको खुलेको प्रहरीले जनाएको छ। त्यसपछि रवीन्द्र साहको प्र.१–०२०४६ प ७४१० नम्बरको मोटरसाइकल चढी दुहबी इनरुवा, सप्तरीको राजविराज हुँदै कुनौली पुर्‍याएको र उक्त स्थानबाट भारतीय गाडी रिजर्भ गरी दरभंगा पठाएर रवीन्द्रकुमार साह सोही दिन विराटनगर फर्केको अनुसन्धानमा खुलेको छ।

बालिका हराएको पोष्ट  हटाउन धम्की
योजनाकार रवीन्द्रले अनुको मोबाइलमार्फत पीडित परिवारलाई  बालिका हराएको पोष्ट सामाजिक सञ्जालबाट हटाउन धम्की समेत दिएका थिए। भारतको दरभंगामा अनुले बच्चालाई लिएर दुई दिनदेखि बस्दै आएकी अनुसन्धानमा खुलेको छ। खोजी गर्ने क्रममा आज बिहान ८ बजे नेपाल-भारतको सीमाक्षेत्रबाट अपहृत बालिकाको सकुशल उद्धार गरिएको र अनुलाई पक्राउ गर्न सफल भएको प्रहरीले जनाएको छ।

यसैगरी घटनाका योजनाकार रवीन्द्रलाई भने बुढीगंगा-१ स्थित उनले सञ्चालन गरेको श्रीराम ट्रेडर्सबाट प्रहरीले पक्राउ गरेको थियो। उनीहरू दुवैजनालाई अपहरण तथा शरीर बन्धक मुद्दामा अनुसन्धान गरिने प्रहरीले जनाएको छ।

फौजदारी संहिता २०७४ अनुसार निज प्रतिवादीहरूलाई ७ देखि १० वर्षसम्म कैद र ७० हजारदेखि १ लाखसम्म जरिवाना हुने व्यवस्था छ। प्रहरीले उनीहरूको साथबाट ५ थान मोबाइल, बेबी फिडिङको खाली प्याकेट १ थान, मोटरसाइकल १ थानलगायत बरामद गरेको छ।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.