बैतडी : भारतसँग सीमा जोडिएको बैतडी जिल्लाका सबै स्थानीय तहमा क्वारेन्टाइन र होल्डिङ सेन्टर निर्माण गरिने भएका छन्। कोरोना संक्रमण फेरि फैलन सक्ने भन्दै त्यसबाट बच्न पूर्वतयारीस्वरुप सबै पालिकामा होल्डिङ सेन्टर र क्वारेन्टाइन निर्माण गरिने भएको हो।
जिल्ला विपद् व्यवस्थापन समितिको बैठकले कोरोनाको चौथो लहरको जोखिम बढेकोले त्यसबाट बच्नका लागि आवश्यक सतर्कता अपनाउने निर्णय गरेको प्रमुख जिल्ला अधिकारी सुरेश पन्थीले जानकारी दिए।
प्रत्येक स्थानीय तहमा होल्डिङ सेन्टर निर्माण अघि बढाउने र दशरथचन्द नगरपालिका क्षेत्रभित्र जिल्लास्तरीय होल्डिङ सेन्टर निर्माण गर्ने निर्णय पनि भएको जिल्ला विपद् व्यवस्थापन समितिले जनाएको छ। जिल्लास्तरीय होल्डिङ सेन्टर निर्माणका लागि ठाउँ पहिचान गरी निर्माणको जिम्मा दशरथचन्द नगरपालिकाले लिने निर्णय भएको छ।
कोरोनाविरुद्ध खोप लगाउन छुटेकालाई खोपको दायरामा ल्याउने, स्थानीय तहमा क्वारेन्टाइन र आइसोलेशन तयारी अवस्थामा राख्ने निर्णयसमेत भएको छ।
भारतबाट झुलाघाट नाका भई स्वदेश फर्कने नागरिकको कोरोना परीक्षण गर्दा पोजेटिभ देखिए उनीहरूलाई सम्बन्धित स्थानीय तहमा पुर्याउन सामूहिक कोष स्थापना गर्ने निर्णय भएको छ। कोषमा प्रत्येक स्थानीय तहबाट तत्काल ५० हजारका दरले रकम जम्मा गर्ने र त्यसको सम्पूर्ण व्यवस्थापन स्वास्थ्य कार्यालयले गर्ने निर्णय भएको छ।
जिल्लामा सञ्चालनमा रहेका एम्बुलेन्सको लगत यथाशीघ्र जिल्ला एम्बुलेन्स व्यवस्थापन समितिको सचिवालयमा पेश गर्ने र राष्ट्रिय एम्बुलेन्स निर्देशिका २०७८ अनुसार स्तरोन्नति गरेर सञ्चालन गर्ने निर्णय भएको छ।
दशरथचन्द नगरपालिका, पुर्चौंडी नगरपालिका, सिगास गाउँपालिका र शिवनाथ गाउँपालिकाले संकलन गरेको विपद् प्रभावितको तथ्यांक स्वीकृत गर्दै पुनर्निर्माण र पुनःस्थापनाका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सिफारिश गर्ने निर्णय भएको छ।
यसैगरी प्रत्येक स्थानीय तहमा स्थानीय आपतकालीन कार्य सञ्चालन केन्द्र स्थापना गर्ने निर्णय भएको छ। त्यसका लागि जिल्ला आपतकालीन कार्य सञ्चालन केन्द्र र नेपाल रेडक्रस सोसाइटीसँग समन्वय गरेर अघि बढ्नेसमेत निर्णय भएको छ।
बैठकले दशरथचन्द नगरपालिका-५ का देवराम लुहारको परिवारलाई तत्काल राहतस्वरुप १५ हजार रूपैयाँ दिने निर्णय गरेको छ। अविरल वर्षाका कारण देवरामको घर साउन ११ गते पूर्ण क्षतिग्रस्त भएको थियो।
तपाईंको ईमेल गोप्य राखिनेछ ।