काठमाडौं : विश्व खेलकुदकै सर्वाधिक लोकप्रिय प्रतियोगिताको रुपमा रहेको विश्वकप फुटबल प्रतियोगिता निर्धारित मिति भन्दा एकदिन अघिबाट सुरुवात गरिने संभावना प्रबल बनेको छ।
कतारले फिफासँग प्रतियोगिताको उद्घाटन एक दिन अघि गर्न स्विकृत मागेको समाचार संस्था रोयटर्सले जनाएको छ। स्रोतलाई उदृत गर्दै रोयटर्सले आयोजक देश र फिफाबीच सहमति भएको र अब ६ महादेशीय प्रमुखसँग सहमति पछि आधिकारिक निर्णय सार्वजानिक गरिने जनाइएको छ। पूर्वनिर्धारित तालिकाअनुसार कतार र इक्वेडरबीचको विश्वकप उद्घाटन खेल २१ नोभेम्बर (५ मंसिर) हुने कार्यतालिका रहेको थियो।
तर फिफाको तालिका अनुसार विश्वकपको उद्घाटन अघि समूह 'ए' अन्तर्गत सेनेगल र नेदरल्यान्ड्स र समूह 'बी' अन्तर्गत इङ्ल्यान्ड र इरानबीचको खेल हुने कार्यतालिका थियो। अर्थात् २१ नोभेम्बरको ३:४५ मा सेनेगल र नेदरल्यान्ड तथा ६:४५ इंग्ल्यान्ड र इरानबिच खेल हुने कार्यतालिका रहेको थियो। त्यसपछि उद्घाटन समारोह सुरु गरेर कतार र इक्वेडरबीच ९:४५ मा खेल हुने कार्यतालिका रहेको थियो।
तर विश्वकप फुटबल जस्तो महत्वपुर्ण प्रतियोगिताको उद्घाटन खेलअघि दुईवटा खेल निर्धारित हुनु असामान्य भन्दै आलोचना भएको थियो। सामान्यतः ठूला खेलकुद प्रतियोगिताको उद्घाटन खेलअघि अन्य खेलहरु हुँदैनन्।
त्यसैले आयोजक कतारले फिफाको नेतृत्वसँग उद्घाटन समारोह र आयोजक देशको खेल आइतबार २० नोभेम्बरमा गर्नका लागि सहमति गरेको जनाइएको छ।
कतारको यो प्रस्तावमा फिफाका ६ महादेशीय संघका प्रमुख र अध्यक्ष जियान्नी इन्फान्टिनोले सहमति जनाउनुपर्ने छ। छोटो समयमा गरीएको यो प्रस्तावमा सहमति हुने संभावना बलियो रहेको जनाइएको छ। जसका कारण प्रतियोगिता एकदिन अघि नै सुरु हुने संभावना बलियो बनेको हो।
ढिलै गरी प्रस्ताव गरिए पनि यसमा सबैको सहमति हुने अनुमान गरिएको छ। उद्घाटनको दिन निर्धारित तीनमध्ये एक खेल अघिल्लो दिन सारिँदा अन्य खेलहरु निर्धारित समयमै हुनेछन्। यो निर्णय बिहीबारसम्म हुने सम्भावना छ। पूर्वनिर्धारित मितिअनुसार टिकट र होटलको बन्दोबस्त गरेकाका लागि पनि कुनै समस्या नबनाउने कतारले आश्वास्त पारेको छ।
तपाईंको ईमेल गोप्य राखिनेछ ।