काठमाडौं : नेपाल क्रिकेट संघको आधिकारिक लिग भनिएको नेपाली टी–२० लिगमा खेलाडीको पारिश्रमिक विवाद तथा व्यवस्थापनका बारे छानबिन गर्ने गठित समितिले बुधवार राष्ट्रिय खेलकुद परिषद् (राखेप) लाई प्रतिवेदन बुझाएको छ।
एकेन्द्र कुँवरको संयोजकत्वमा ५ सदस्यीय छानबिन समितिले बुधबार राखेप सदस्यसचिव टंकलाल घिसिङलाई नेपाल टी–२० लिग आयोजनाका लागि भारतीय कम्पनी सेभन थ्री स्पोर्टस र क्यानबीचको सम्झौता खारेज गर्ने लगायतका निष्कर्ष निकाल्दै ४६ पृष्ठ लामो प्रतिवेदन बुझाएको हो।
लिग आयोजनाको क्रममा साझेदार विदेशी कम्पनीसँगको सम्झौता, सञ्चालन लगायतका विषयमा प्रचलित ऐन, नियम तथा राष्ट्रिय खेलकुद विकास ऐन, २०७७ को दफा २८ मा भएको शर्त र दफा ४४ को उपदफा (२) मा भएको व्यवस्थाको पालना नभएको र सम्बन्धित पक्षलाई राष्ट्रिय खेलकुद विकास ऐन, २०७७ को दफा २९ मा भएको व्यवस्था आकर्षित हुने ठहर गरेको छ।
साथै प्रचलित ऐन, नियमबमोजिम प्रक्रिया पूरा नगरी प्रतियोगिता आयोजना सम्बन्धमा भएको सम्झौता तत्काल खारेज गर्न पनि निर्देश गरेको छ।
नेपाल टी-२० लिगमा शंकास्पद एवं अस्वाभाविक गतिविधिका कारण फिक्सिङ हुने सम्भावनाका विषयमा अनुसन्धान गर्ने आधिकारिक निकाय नेपाल प्रहरीको सिआइबीबाट भइरहेको अनुसन्धानबाट प्राप्त निस्कर्षको आधारमा दोषीमाथि प्रचलित कानून एवं राष्ट्रिय खेलकुद विकास ऐन, २०७७ को दफा ३३ बमोजिम हुने कारवाहीमा आवश्यक सहयोग गर्ने निर्णय कार्यदलले गरेको छ।
कार्यदलले आइसिसीसँग आवश्यक छलफल र समन्वय गर्न सकिने पनि उल्लेख गरेको छ। प्रतियोगिताका दौरान खेल मिलेमतो, स्पट फिक्सिङ र बेटिङसमेत भएको भन्दै केन्द्रीय अनुसन्धान ब्युरो (सिआइबी) ले पनि प्रारम्भिक प्रतिवेदन सार्वजनिक गरिसकेको छ।
सिआइबीले सोमबार खेल मिलेमतोमा संग्लग्नताको आरोपमा नेपाली राष्ट्रिय क्रिकेट टोलीका पूर्व अलराउण्डर मेहबुब आलम र वर्तमान राष्ट्रिय टोलीका अलराउण्डर मोहम्मद आदिल अन्सारीलाई पक्राउ गरिसकेको छ र ५ दिनको समय थपेर अनुसन्धानका अगाडि बढाएको छ।
तपाईंको ईमेल गोप्य राखिनेछ ।