काठमाडौं : काठमाडौं महानगरले दरबारमार्ग क्षेत्रमा पार्किङको तत्काल व्यवस्था नगरे दरबारमार्ग विकास बोर्डले चरणबद्ध आन्दोलन गर्ने चेतावनी दिएको छ।
शुक्रवार बोर्डले काठमाडौंमा पत्रकार सम्मेलन गर्दै काठमाडौं महानगरपालिकाले दरबारमार्ग क्षेत्रमा हटाएको पार्किङ तत्काल कायम नगरे महानगरविरुद्ध आन्दोलन गर्ने चेतावनी दिएको हो।
बोर्डले विगत लामो समयदेखि दबारमार्ग क्षेत्रमा वडा कार्यालय र ट्राफिक प्रहरीको समन्वयमा सडकको एक लाइनमा पार्किङ गर्दै आएको र एक लाइन पार्किङले ट्राफिक व्यवस्थापनमा कुनै समस्या नभएको बताएको छ।
बोर्डसँग छलफल र संवाद नगरी पार्किङ हटाउने निर्णय बोर्डले नमान्ने जनाएको छ। पत्रकार सम्मेलनमा बोल्दै बोर्डका पूर्वअध्यक्ष गोपाल कक्षपतिले स्मार्ट पार्किङ राखेर व्यवस्थित रूपमा पार्किङ भइरहेका वेला महानगरपालिकाले एक्कासी बन्द गरेको बताए। उनले महानगरले बोर्डसँग तत्काल छलफल गरेर पार्किङ व्यवस्था तत्काल गर्नुपर्ने बताए।
उनले महानगरले एक्कासी पार्किङ हटाउँदा दरबारमार्गको रौनकता र आगन्तुकप्रति पर्ने असुविधा र व्यापारमा पर्ने प्रभावको विषयमा नसोचेको आरोप लगाए। उनले महानगरले दरबारमार्गको रौनक, पर्यटकहरूलाई उचित सुविधा र विश्वसनीयता कायम राख्न तत्काल पार्किङ स्थल यथावत् राख्न आग्रह गरे।
उनले महानगरले बोर्डको मागलाई सम्बोधन नगरे चरणबद्ध रूपमा शान्तिपूर्ण आन्दोलन गर्ने बताए।
उनले महानगरले दरबारमार्ग क्षेत्रका पार्किङ हटाउँदा त्यस क्षेत्रको व्यापार ५० प्रतिशतले खुम्चिएको बताए। उनले पार्किङ नहटाउँदा दरबारमार्गमा मात्र दैनिक १० देखि १२ करोडको व्यापार हुने गरेको बताउँदै अहिले ४/५ करोडमा सीमित हुन पुगेको र पार्किङ नहुँदा ग्राहक पनि आधाभन्दा बढी घटेको बताउँदै व्यवसायीको व्यापार मात्र नभई सरकारले राजस्व समेत घटेको बताए।
तपाईंको ईमेल गोप्य राखिनेछ ।