काठमाडौं : ‘इन्फोडेभलपर्स क्यान इन्फोटेक- २०२३’ प्रदर्शनी आजदेखि भृकुटीमण्डपमा शुरु भएको छ। सञ्चार तथा सूचना प्रविधिमन्त्री रेखा शर्माले प्रदर्शनीको मंगलबार उद्घाटन गरेकी हुन्।
सूचना तथा सञ्चार प्रविधि क्षेत्रका विभिन्न उत्पादन र सेवाबारे जानकारी दिने उद्देश्यले आयोजित प्रदर्शनी माघ २९ गतेसम्म चल्नेछ।
प्रदर्शनीमा सूचना तथा प्रविधि क्षेत्रका हार्डवेयर, सफ्टवेयर, इन्टरनेट सेवाप्रदायक, मोबाइल तथा मोबाइल एक्सेसरिजलगायत कम्पनीका दुई सयभन्दा बढी स्टल राखिएका छन्। माघ २५ देखि २८ गतेसम्म हरेक दिन आइसिटी सेमिनार सञ्चालन गरिने पनि आयोजक क्यान महासंघले जनाएको छ।
क्यान इन्फोटेकमा विभिन्न प्रविधिका वस्तु तथा सेवाको ब्रान्डिङ, प्रडक्ट लन्चिङ, विद्यार्थीका लागि आइटी करियर काउन्सिलिङलगायत कार्यक्रम समावेश गरिएको छ।
योपटकको प्रदर्शनीमा नेपाली इनोभेशन, प्रतिभा र स्टार्टअपलाई प्राथमिकतामा राखिएको र करिब साढे तीन लाखजनाले प्रदर्शनी अवलोकन गर्ने अपेक्षा गरिएको छ।
तपाईंको ईमेल गोप्य राखिनेछ ।