|

म्याग्दी : कृषिमा यन्त्रीकरण भएपछि म्याग्दीमा बाली उत्पादन बढेको छ। परम्परागत रूपमा जोत्दै आएको खेतबारीमा आधुनिक यन्त्र प्रयोग गर्दा कम लागतमा उत्पादन बढेको किसानको भनाइ छ।

किसानको धेरै समय खेतबारी खनजोतमा नलाग्ने र काम गर्न सहज हुने भएपछि यन्त्रीकरणतर्फ किसानको आकर्षण बढ्दो छ।

बेनी नगरपालिका–२ खवराका अगुवा कृषक चन्द्रबहादुर कार्कीले पुर्खौंदेखि खेत जोत्न प्रयोग हुँदै आएको ‘गोरुले जोत्न’ छोडेका छन्। उनले अहिले खेतबारी जोत्न गोरुको ठाउँमा (पावर टिलर) प्रयोग गर्छन्।

‘कम श्रममा एकैपटक धेरै खेत जोत्न सकिने भएपछि गोरु बेचेर पावर टिलर किनेको हुँ’, उनले भने, ‘गोरु पाल्नका लागि घरका अरू सदस्यले घाँस काट्ने, खुवाउने र चराउने काम पनि घटेको छ। पावर टिलर किनेपछि काम छिटोछरितो भएको छ।’

पावर टिलर प्रयोग गरेपछि चार दिनको काम दुई घण्टामा पूरा भएको कृषकको भनाइ छ। कृषि यन्त्रको सहयोगले कृषि कार्यले काममा सहज हुनुका साथै समयको बचत भएको उनी बताउँछन्। कृषि उत्पादनमा विगतको तुलनामा दोब्बरले वृद्धि भएको छ।

पावर टिलरले जोतेको खेतमा बाली धेरै उब्जनी भएको छ। गोरुले जोतेकोभन्दा धेरै राम्रोसँग माटो जोतिने भएकाले रोपाइँ गर्दा पनि एकदमै छिटो र सजिलो हुन्छ।

आफ्नो जमिन जोतेर सकियो भने अरूको खेत जोतेर आम्दानी पनि हुने गरेको छ, गाउँघरका अरूका खेतबारी जोतेर आम्दानी हुने गरेको छ। अहिले आफूसँग कर्नसेलर, पावर टिलर र रिपरलगायतका कृषि यन्त्र रहेको कार्की बताउँछन्।

मालिका गाउँपालिका–२ का भीमबहादुर बुढाले विगत तीन वर्षदेखि खेतबारी जोत्न पावर टिलर प्रयोग गर्दै आएका छन्। उनले प्रयोग गर्ने पावर टिलर अनुदानमै पाएका हुन्।

पावर टिलरले जोतेको माटो मसिनो र एकनासले जोतिने भएकाले बाली लगाउन सजिलो हुने र मेलो सजिलै सर्ने गरेको उनको अनुभव छ। यसले कृषि उत्पादन समेत बढेको कृषक बूढा बताउँछन्।

‘धान, गहुँलगायतका बाली भित्र्याउँदा विगतमा धेरै जनशक्ति चाहिन्थ्यो। गोरुको सहायताले दाइँ गर्नुपर्थ्यो, खेतबाट खलियानमा ल्याउन र खलियानमा ल्याएको बाली घरमा भित्र्याउन महिनौँ कुर्नुपर्थ्यो’, उनले भने, ‘अहिले खेतमै पावर टिलर, ट्याक्टरमा ट्रली जोडेर खलियानसम्म बाली ल्याउन सजिलो भएको छ। यन्त्रमा रिपर जडान गरेर धान गहुँ दाउन थ्रेसरको सहायताले छिटो काम हुन थालेको छ।’

कृषिमा परम्परागत साधनको प्रयोगले पहिलेपहिले मजदुरको सहयोग लिँदा धेरै खर्च हुने गरेको अनुभव रहेको बताउँछन्, मंगला गाउँपालिका रणबाङका कृषक हरिकृष्ण पौडेल। उनले आधुनिक कृषि यन्त्र प्रयोगले समय र लागतसमेत घटेको बताउँछन्।

मजदुर पनि नपाइने भएकाले यन्त्र प्रयोग गरेर खेती गर्दा कम लागतमा कृषिको उत्पादन लिन सकिएको बताउँदै पौडेलले भने, ‘अब धान रोप्ने यन्त्र पनि ल्याउने सोचाइमा छु।’

यस्तै बेनी नगरपालिका–५ पुलाचौरका राम बानियाँले पहिले पहिले घरपरिवारको खर्चका लागि मात्र खेतीपाती गर्दै आएकोमा कृषिमा सहयोग पुगोस् भनेर पावर टिलर र रिपर अनुदानमा पाएपछि व्यावसायिक तरकारीखेतीमा लागेको बताए।

‘यन्त्र प्रयोग भएपछि काममा सजिलो भएको छ, खनजोत र गोडमेल गर्न ज्यालामा मजदुर खोज्न परेको छैन, घरपरिवारले मात्रै सजिलै काम गर्न सकेका छौँ’‚ उनले भने।

व्यावसायिक खेती गर्ने अधिकांशले परम्परागत रूपमा प्रयोग गर्दै आएका कृषि साधनको साटोमा आधुनिक कृषियन्त्र प्रयोग गरेकाले सबैलाई खेती गर्न सजिलो भएको छ।

अहिले यान्त्रिक हलो प्रयोग गर्न थालेपछि गाउँघरमा व्यावसायिक खेती गर्नेको संख्या बढेको उनले बताए। खतजोत गर्न सजिलो भएपछि ग्रामीण क्षेत्रका कृषकले वर्षभर नै मौसमी र बेमौसमी तरकारी उत्पादनमा लागेका छन्।

मंगला गाउँपालिकाका कृषि प्राविधिक जगत बानियाँले व्यावसायिक किसानलाई छनोट गरी उत्पादकत्व बढाउन सहयोग पुगोस् भनेर ५० प्रतिशत अनुदानमा कृषियन्त्र वितरण गर्न थालेको बताए।

उनले किसानलाई आवश्यक कृषि औजार माग गर्न किसानको जानकारीका लागि सूचना जारी गरेपछि किसानले मेसिन माग गरेअनुसार प्रक्रिया पुर्‍याएर कृषियन्त्र वितरण गर्ने गरेको बताए। त्यसमध्ये कम लागतमा साना व्यावसायिक किसानले किन्न सक्ने भएकाले अनुदानमा किसानले पावर टिलरको माग धेरै गरेको उनी बताउँछन्।

कृषि कार्यका लागि किसानले पावर टिलर र औजारको प्रयोग गर्न थालेपछि आम्दानी बढेको र समयको बचत भएको प्रतिक्रिया छ। कृषि ज्ञानकेन्द्र म्याग्दीका प्रमुख किरण सिग्देलले आधुनिक कृषियन्त्र तथा औजार विगतका वर्षमा किसानलाई पावर टिलर, रिपर, कमान हार्डभेस्टर, रोटावेटर, ठूलो ट्याक्टरलगायतका कृषियन्त्र वितरण गरिएको बताए।

कृषियन्त्र र औजार प्रयोगले किसानलाई खेतीमा आकर्षण गरेको छ। सरकारले कृषिको उत्पादकत्व बढाई कृषि उत्पादनको लागत खर्च कटौती गर्न यन्त्रको मूल्यअनुसार ५० देखि ६० प्रतिशत अनुदानमा कृषियन्त्र उपलब्ध गराउन थालेपछि किसानले कृषियन्त्रको प्रयोगलाई प्राथमिकता दिन थालेकाले यतातिर किसानको आकर्षण बढेको छ।

साना किसानका लागि पावर टिलर र ठूला किसानका लागि ठूलो ट्याक्टर अनुदानमा प्रदेश सरकारले विगतका वर्षमा उपलब्ध गराएको थियो।

जिल्लामा खनजोत गर्न ट्याक्टरको प्रयोग बढेको छ भने गोरु र हलो विस्थापित हुने क्रममा छन्। कार्यालयले ४ वर्षको अवधिमा जिल्लाका प्रायः सबै गाउँपालिकामा गरी १ हजार ४४२ वटा हाते ट्याक्टर वितरण गरिसकेको कृषि ज्ञानकेन्द्र म्याग्दीले जनाएको छ।

कार्यालयले धान र गहुँ झार्ने थ्रेसरसमेत वितरण गरेकाले कृषकलाई दाइँ गर्ने झन्झटसमेत हटेको कृषि ज्ञानकेन्द्र म्याग्दीका प्रमुख किरण सिग्देलको भनाइ छ।
जिल्लाको समथर फाँट भएका खेतमा ठूला ट्याक्टरको प्रयोग बढेको छ भने पहाडी तथा भिरालो र ससाना गरामा हाते ट्याक्टर प्रयोग भएको पाइन्छ।

कार्यालयको योजना र मागअनुसारको सहयोग सरकार वा कुनै पनि दातृनिकायबाट प्राप्त भइरहे अबको ५–७ वर्षमा जिल्लामा यान्त्रिक खेती प्रणाली विकास हुने उनले बताए।

‘पहिले जनशक्ति नहुँदा खेतबारी बाँझै हुन्थ्यो’, उनले भने, ‘उपकरणको प्रयोगले सबैतिर खेती भएको पाइन्छ।’ व्यवसायकै लागि किसानले ट्याक्टर किनेका छन्।

खेतीको समयमा खेत जोत्न ट्याक्टर धनीलाई भ्याइनभ्याई हुन्छ भने अन्य समयमा निर्माण सामग्रीको ढुवानीमै व्यस्त देखिन्छन्। कृषि फार्ममा किसानलाई सजिलो र सहज बनाउन हरेक वर्ष हाते ट्याक्टर वितरण गर्दै आएको कार्यालयले जानकारी दिएको छ।


 

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.