|
फाइल फोटो

पर्वत : अन्नपूर्ण प्रथम हिमाल आरोहण दिवसका अवसरमा आयोजना हुँदै आएको अन्नपूर्ण म्याराथन आगामी जेठमा हुने भएको छ। 

अन्नपूर्ण आधार शिविरदेखि घान्द्रुकसम्म (१४२.१९५ कि.मी.) लम्बाइको म्याराथन सेन्चुरी पर्यटन समितिले अन्नपूर्ण प्रथम हिमाल आरोहण दिवसका अवसरमा अन्नपूर्ण म्याराथनलाई निरन्तरता दिन लागेको हो। कोभिड–१९ का कारण दुई संस्करण स्थगित भए पनि समितिले यो पटक म्याराथनलाई निरन्तरता दिन लागेको अध्यक्ष ललित गुरुङले बताए। 

स्थानीय पर्यटन व्यवसायीले म्याराथनलाई सफल पार्न एकजुट भएर अघि बढ्ने प्रतिबद्धता व्यक्त गरेका छन्। अन्नपूर्ण आधार शिविरको पर्यटन पूर्वाधार निर्माण गरी पर्यटन प्रवर्धन गर्न विगतमा निरन्तर पर्यटन महोत्सव र अन्नपूर्ण म्याराथन हुँदै आएको थियो। प्रतिकूल परिस्थितिका कारण गत वर्षका कार्यक्रम स्थगित भए पनि यस पटक पूर्वनिर्धारित समय अनुसार नै कार्यक्रमलाई निरन्तरता दिइने समितिका सचिव मिकास गुरुङले बताए। 

२०७५ फागुन १५ को हिमपातबाट अन्नपूर्ण आधार शिविरमा आएको हिमआँधीले अन्नपूर्ण आधार शिविरका होटेलमा भएको गम्भीर क्षति, नेपाल भ्रमण वर्ष २०२० घोषणा भएलगत्तै अन्नपूर्ण पदयात्रा मार्ग अन्तर्गत हिन्कु केभमा हिमपहिरोका कारण भएको दुःखद घटना र विश्वव्यापी कोभिड–१९ को संक्रमण र निषेधाज्ञाका कारण त्यस क्षेत्रको पर्यटन व्यवसायसँगै देशको सम्पूर्ण अर्थतन्त्रमा समेत गम्भीर असर परेको छ। 

पर्यटन क्षेत्रलाई धराशायी हुन नदिन विशेष राहत प्याकेज कार्यक्रम सञ्चालन गरी अर्थतन्त्रको सबलीकरण गर्न स्थानीय, प्रदेश र संघ सरकारसँग विशेष अनुरोध गर्ने समितिले जनाएको छ।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.