महेन्द्रनगर : कञ्चनपुरको पूर्व–दक्षिण क्षेत्रमा पर्ने मोहना–लालझाडी करिडोरमा २ वटा डमरुसहित बाघ देखिन थालेपछि मानवीय क्षति रोक्न वन कर्मचारी सक्रिय भएका छन्।
एक सातायता कञ्चनपुरको पुनर्वास नगरपालिका–११ र धनगढी उपमहानगरपालिका–३ मा पर्ने करिडोर क्षेत्रमा स्थानीयले डमरुसहित बाघ देखेपछि डिभिजन वन कार्यालय कञ्चनपुरले मानवीय क्षति हुन नदिन सक्रियता बढाएको हो।
‘यसअघि पनि सो क्षेत्रमा बाघ नदेखिएको होइन,’ कुण्डा सब-डिभिजन वन कार्यालयका सहायक वन अधिकृत दिनेशकुमार यादवले भने, ‘एक सातायता बाघ देखिन थालेपछि सो क्षेत्रका सामुदायिक वनका उपभोक्तालाई कर्मचारी खटाएर सचेत रहन भनिरहेका छौँं।’
मोहना–लालझाडी करिडोर भारतको दूधवा नेशनल पार्क र कञ्चनपुरको शुक्लाफाँटा राष्ट्रिय निकुञ्जसँग जोडिएको छ।
‘पुनर्वास नगरपालिका–१० र ११ बाट भारतको दूधवासित जोडिएको छ भने बेलौरी नगरपालिकाको रामपुर गाउँ हुँदै करिडोर शुक्लाफाँटासित जोडिएको छ‚’ सहायक वन अधिकृत यादवले भने, ‘करिडोरमा पनि संरक्षण र वासस्थानको अवस्था राम्रो भएकाले पछिल्लो समय बाघलगायत वन्यजन्तु बढिरहेका छन्।’
२ दिनअघि पुनर्वास नगरपालिका–१० की ३२ वर्षीया कलसा सार्कीको दूधवा नेशनल पार्कमा बाघको आक्रमणबाट निधन भएपछि सो क्षेत्रमा भारतीय वन तथा सुरक्षाकर्मीले पनि सक्रियता बढाएका छन्।
‘मानिस आक्रमण गर्ने बाघ नै यहाँ दिनहुँ देखिन थालेको हो कि भन्ने आशंका छ,’ यादवले भने, ‘सोहीअनुसार भारतीय वनकर्मीसित पनि समन्वय गरिरहेका छौँ।’
उनले शुक्लाफाँटा र दूधवा नेशनल पार्कमा बाघको सङ्ख्या बढेकाले करिडोरमा पसेको हुनसक्ने बताए। उनले करिडोर वरपर सचेतना अपनाउन सामाजिक सञ्जालको उपयोग गरिएको जानकारी पनि दिए।
तपाईंको ईमेल गोप्य राखिनेछ ।