|

वासिङ्टन डिसी : अमेरिकाको न्यूयोर्क राज्यको क्विन्स बोरोको ७५ स्ट्रिटको ब्रोड वे र उडसाइडको सडकलाई  पहिलो सगरमाथा आरोही तेन्जिङ नोर्गे शेर्पा नामकरण गरिएको छ।

उक्त सडकलाई नामकरणका लागि छ वर्षदेखि स्थानीयरूपमा सक्रिय रहेका युनाइटेड शेर्पा किदुङ र यूएसएनेपाल क्लाइम्बर्स एसोसिएसनले सिटीसँग पहल गर्दै आएकोमा गत अप्रिलमा न्यूयोर्कको क्विन्सको डिष्ट्रिक २५ को सिटी काउन्सिलले अनुमति दिएको थियो।

क्लाइम्बर्स एसोसिएसनका अध्यक्ष पासाङनिमा शेर्पाले भने, ‘सिटीको अनुमति पाएपछि हामीहरूले सगरमाथा दिवसकै दिन पारेर सडकको नाम तेन्जिङ शेर्पाको नाममा राखेका हौँ’, उनले भने, ‘हामी सगरमाथाको देशबाट आएर पहिलो सगरमाथा आरोहीकै नाममा न्यूयोर्कजस्तो विशाल सिटीमा सडकको नामकरण हुनु साह्रै गर्वको विषय हो।’

लामो समयदेखि न्यूयोर्कमा बस्दै आएका जनसम्पर्क समिति अमेरिकाका अध्यक्ष आनन्द विष्टले तेन्जिङको नाममा सडकको नामकरण हुनु सुखद भएको टिप्पणी गरे। ‘सगरमाथाको देश भनेर हामी विश्वभरि चिनिन्छौँ, त्यसमा पनि प्रथम आरोही तेन्जिङ शेर्पाको नाममा सडकको नामकरण हुनु खुशीको कुरा हो’, उनले भने। 

यसअघि प्रथम दक्षिण एसियाली मूलकी कंग्रेस वुमन जेनिफर राजकुमारले एक संकल्पपत्र पास गरी मे २९ लाई सगरमाथा दिवसका रूपमा मान्यता दिलाएका थिए। यसैअनुरूपसोमबार ७०आँै सगरमाथा दिवस पनि मनायो। कार्यक्रममा तेन्जिङ शेर्पाका छोरा नोर्बु तेन्जिङ नोर्गे पनि सहभागी थिए।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.