काठमाडौँ : प्रधानमन्त्री एवं नेकपा (एमाले) का अध्यक्ष केपी शर्मा ओलीले एमालेसँग मिशन–२०८४ एकल बहुमत ल्याउने बलियो आधार रहेको दाबी गरेका छन्।
शनिवार एमालेले काठमाडौँमा आयोजना गरेको एक कार्यक्रममा बोल्दै उनले यस्तो दावी गरेका हुन्। प्रधानमन्त्री ओलीले एमालेसँग अहिले मिशन २०८४ मा एकल बहुमत ल्याउने आधार भएकाले त्यसलाई सफल पार्न सम्पूर्ण शक्ति परिचालन गर्न पनि नेता कार्यकर्तालाई निर्देशन दिए।
उनले माओवादी केन्द्र भने आगामी निर्वाचनमा राष्ट्रिय पार्टी मुस्किलले बन्ने तर्क गरे। माओवादी केन्द्रले विगतमा निर्वाचनमा जनताको विश्वास गुमाउँदै गएको उल्लेख गर्दै आगामी निर्वाचनमा ४-५ लाख मत ल्याएर राष्ट्रिय पार्टीसम्ममा अडिएला कि भन्ने ओलीको तर्क थियो। उनले राष्ट्रिय स्वतन्त्र पार्टीलाई खन्चुवा पार्टीको रूपमा चित्रण गरे।
प्रधानमन्त्री ओलीले भने, ‘अहिले हाम्रा अगाडि मिसन २०८४ मा एकल बहुमत मजाले ल्याउन सक्ने बलिया आधार छन्। मैले एउटा पेपरमा हिजो मात्रै देखेको थिएँ–माओवादीको १९ लाख भोट कहाँ गयो भन्ने ? गम्भीर प्रश्न, विश्लेषण थियो। अब अर्को चुनावमा पुग्दाखेरी ४-५ लाख आउँला कि। राष्ट्रिय पार्टीसम्ममा अडिएला कि। अवस्था त्यो छ।’
प्रधानमन्त्री ओलीले जनताको हितमा काम गर्ने पार्टीलाई मात्रै नेपाली जनताले विश्वास गर्ने बताए।
तपाईंको ईमेल गोप्य राखिनेछ ।