इजरायलले हिजबुल्लाह समूहलाई समर्थन गर्ने लेबनानी बैंक तथा वित्तीय संस्थाहरूमा आक्रमण गरेको छ।
गएराति राजधानी बेरुत तथा दक्षिणी लेबनानका कयौँ वित्तिय संस्थामा आक्रमण भएको र रातभरजसो विस्फोटको आवाज सुनिएको बीबीसीले जनाएको छ। आक्रमणअघि इजरायल डिफेन्स फोर्सेजले राजधानी बेरुतसहितका विभिन्न २४ स्थानमा ठाउँ खाली गर्न चेतावनी दिएको थियो।
खाली गर्न चेतावनी दिइएकामध्ये १४ क्षेत्र बेरुतका हुन्। आक्रमणबाट वित्तीय संस्था रहेका ठूला भवन ध्वस्त भएका छन्। यस्तै हिजबुल्लाहकै नियन्त्रण रहेको बेरुतको दक्षिणी क्षेत्र दहिह शहरमा इजरायली सेनाले आठवटा हवाई आक्रमण गरेको छ। लेबनानी सञ्चारमाध्यमका अनुसार देशको पूर्वी इलाकामा पनि आक्रमण भएको छ, जहाँ आक्रमणबारे पूर्व जानकारी गराइएको थिएन।
यसअघि हिजबुल्लाह समूहले आइतबार इजरायलका विभिन्न सैन्य क्याम्पलक्षित रकेट प्रहार गरेको थियो। यसैबीच भारतको जम्मु कश्मीरस्थित गांदरबलमा आतंकवादी समूहको आक्रमणमा एक चिकित्सकसहित सातजनाको मृत्यु भएको छ। पाँचजना घाइते भएका छन्।
भारतीय सञ्चारमाध्यमका अनुसार केन्द्रीय सरकारले निर्माण गरिरहेको एक सुरुङ परियोजनामा काम गरिरहेका मजदुर आक्रमणमा परेका हुन्। मृत्यु हुने सबै गैरस्थानीय रहेको र पहिचान खुलेकाहरू पञ्जाबका रहेको बताइएको छ।
तपाईंको ईमेल गोप्य राखिनेछ ।