सुर्खेत : मंसिर १६ गते हुन गइरहेको उपनिर्वाचनमा जाजरकोटका दुई स्थानीय तहको लागि नेपाली कांग्रेसले उम्मेदवार तय गरेको छ। पालिका कमिटीको सिफारिसमा बिहीवार प्रदेश कमिटीले उम्मेदवार तय गरेको हो।
नलगाड नगरपालिकाको उपप्रमुखको उम्मेदवारका लागि इन्द्राचन्द सिंहको नाम तय भएको छ। कुशे गाउँपालिकाको वडा नम्बर ७ को अध्यक्ष पदमा हुन लागेको उपनिर्वाचनको उम्मेदवार खम्बबहादुर सिंहलाई टुंगो लागेको नेपाली कांग्रेस जाजरकोटका सभापति बेदराज सिंहले बताए।
जाजरकोटको नलगाड नगरपालिका उपप्रमुख सरिता सिंहको २०८० कात्तिक १७ गतेको भूकम्पमा मृत्यु भएपछि उपप्रमुख पद रिक्त थियो। अहिले कांग्रेसले उम्मेदवार बनाएकी इन्द्राचन्द सिंह सरिताकै भाइ बुहारी हुन्।
कुशे गाउँपालिका वडा नम्बर ७ का अध्यक्ष मनबहादुर घर्तीको २०७९ असारमा मृत्यु भएको थियो। उनी २०७९ वैशाखमा भएको निर्वाचनमा माओवादीका तर्फबाट ३८० मत प्राप्त गरी विजय भएका थिए।
उक्त ठाउँमा अहिले कांग्रेसले उठाएका खम्बबहादुर सिंहले ३१८ मत पाएका थिए।
तपाईंको ईमेल गोप्य राखिनेछ ।