झापा : कुनै वेला झापाको बिर्तामोडमा सरकारी स्वास्थ्य संस्था भन्ने वित्तिकै नाक खुम्च्याउने गरिन्थ्यो। सरकारी स्वास्थ्य संस्थाप्रति नगरवासीको विश्वास न्यून थियो। अधिकांश आर्थिक अवस्था कमजोर भएकाहरू मात्र सेवा लिन जान्थे। तर, अहिले अवस्था फेरिएको छ। सुविधा सम्पन्न नगर अस्पतालबाट गुणस्तरीय सेवा प्रदान हुन थालेपछि नगरवासीको आकर्षण बढेको छ।
नगर अस्पतालको सेवामा विविधतासँगै सुविधासम्पन्न भवनबाट सेवा प्रदान हुन थालेपछि अहिले दैनिक ४०० देखि ५०० जनाले सेवा लिन थालेका छन्। स्वास्थ्य क्षेत्रलाई नगरले विशेष प्राथमिकता दिइएको बिर्तामोड नगरपालिकाकी नगरप्रमुख पवित्रा महतारा प्रसाईँले बताइन्।
‘चौबिसै घण्टा सेवा सञ्चालनको तयारीमा छौँ’, उनले भने, ‘नयाँ भवन निर्माणको काम समयमै सम्पन्न नहुँदा समस्या भइरहेको छ।’ निर्माण कम्पनीले काममा ढिलासुस्ती गरिरहेकाले समस्या भइरहेको नगरप्रमुख प्रसाईँले बताइन्। अहिले नगर अस्पताल १५ शय्याको छ। यसलाई २५ शय्याको बनाउने लक्ष्य छ। ‘नगर अस्पताललाई विशेष प्राथमिकतामा राखेका छौँ’, उनले भनिन्।
नगर अस्पतालबाट प्रभावकारी रूपमा सेवा प्रवाह हुन थालेपछि विभिन्न जिल्लाबाट नगर अस्पताल सञ्चालनको अवस्था बुझ्न र अनुभव साटासाट गर्न जनप्रतिनिधि आउने गरेका नगरपालिकाका उपप्रमुख नगेन्द्रप्रसाद सङ्ग्रौलाले बताए। अस्पतालले चाँडै डायलाइसिस सेवा सञ्चालन गर्न लागेको छ। ‘६ वटा डायलाइसिस मेसिन दाताबाट प्राप्त भएको छ’, उनले भने।
नगरपालिकामा एक नगर अस्पताल र आठ वडामा आधारभूत स्वास्थ्य केन्द्रबाट स्वास्थ्य सेवा प्रदान गरिँदै आएको छ। रु तीन करोड ९६ लाखको लागतमा आठवटा आधारभूत स्वास्थ्य केन्द्र भवन निर्माण भइसकेका छन्। १५ करोड ३४ हजारको लागतमा नगर अस्पतालको भवन निर्माणको भइरहेको नगरप्रमुख प्रसाईँले बताइन्। भवन निर्माण भएपछि १५ शय्याबाट २५ शय्यामा स्तरोन्नति गरिनेछ।
आधारभूत स्वास्थ्य केन्द्रबाट १२७ प्रकारका औषधि निःशुल्क वितरण हुँदै आएको नगरपालिकाका स्वास्थ्य शाखा प्रमुख राजीव विष्टले बताए। नगरपालिका मातहतका स्वास्थ्य संस्थामार्फत हालसम्ममा ८९ हजार ७६४ जनाले स्वास्थ्य सेवा लिएको नगरपालिकाले जनाएको छ।
नगर अस्पतालमा बिहान ७ बजेदेखि बेलुका ७ बजेसम्म आकस्मिक सेवा सञ्चालित छ। अस्पतालमा चिकित्सकसहित ६० जनाको जनशक्ति छ।
तपाईंको ईमेल गोप्य राखिनेछ ।