खोटाङ :रावाबेँसी गाउँपालिकाका किसानले लिची बेचेर करिब एक करोड रुपैयाँ आर्जन गरेका छन्। यो पालिकामा यो वर्ष १८४ मेट्रिक टन लिची उत्पादन भएको छ। छ वडा रहेको यो गाउँपालिका–१ कुभिण्डेमा सबैभन्दा बढी ८८ मेट्रिक टन लिची उत्पादन भएको जनाइएको छ।
कुभिण्डेमा ११ हेक्टरमा लगाइएको लिचीले उत्पादन दिन थालेको गाउँपालिकाका कृषि शाखा प्रमुख उद्धव बास्तोलाले बताए। पालिकाको वडा नं २ खार्पामा २४ मेट्रिक टन, वडा नं. ३ लामीडाँडामा १६, वडा नं. ४ धारापानीमा १६, वडा नं. ५ दुवेकोलमा आठ र वडा नं. ६ हौँचुरमा ३२ मेट्रिक टन उत्पादन भएको छ।
प्रेमबहादुर मगरले आफूले ३० हजारको लिची बिक्री गरेको कुभिण्डेस्थित लाङ्घाली चोकका बताए। उनले प्रतिदाना एक रुपैयाँमा लिची बिक्री गरेका हुन्।
सोही स्थानका खड्गप्रसाद रेग्मीले ४५ हजारका लिची बेचिसकेका छन्। केही किसानले एक लाख भन्दा बढीका लिची बेचिसकेका कुभिण्डेका वडाध्यक्ष गेहेन्द्रमान राईले जानकारी दिए। रावाबेँसीका किसानले लिचीबाट यो पटक ९५ लाख हाराहारी आम्दानी गरेका उनको अनुमान छ।
रावाबेँसी गाउँपालिकालाई लिची उत्पादनको ‘हब’को रूपमा विकास गर्नेगरी यही असार १० गते सम्पन्न १७ औँ गाउँसभामार्फत नीति तथा कार्यक्रम पारित गरिएको गाउँपालिका प्रमुख फटिककुमार श्रेष्ठले बताए।
तपाईंको ईमेल गोप्य राखिनेछ ।