अर्थ

लकडाउनको प्रभाव : भेरीमा दुई जलविद्युत् आयोजनाको डीपीआर तयारी प्रभावित

चैत १२, २०७६

    भेरी नदीमा निर्माण हुने दुई जलविद्युत् आयोजनाको विस्तृत आयोजना प्रतिवेदन (डीपीआर) तयारीको काम अवरुद्ध भएको छ।

    नेपालमा 'लकडाउन' भएको भन्दै चिनियाँ कामदारहरु आतिएर काम छाडेको जानकारी आएको नलगाड जलविद्युत् आयोजनाका इञ्जिनियर पदम थापाले जानकारी दिए। काम गर्ने चिनियाँ टोली मङ्गलबार दिउँसो रुकुमपश्चिम आठविसकोट नगरपालिकाको राडीमा आएको सूचना पाएको तर खोज्न जाँदा नभेटिएको उनको भनाइ छ। अहिले फेरी प्रहरीसँग सम्पर्क गरेर चिनियाँ टोलीलाई खोज्न जान लागेको उनको भनाइ छ।

    सो टोलीलाई खानेकुराको समस्य भएको भन्दै काम छाडेको सूचना प्राप्त भएको थापाले जानकारी दिए। चाइना गेजुवा कम्पनीले सात सय २१ मेघावाट जलविद्युत् उत्पादन क्षमताको भेरी–१ र भेरी–२ हाइड्रोपावर परियोजनाको डीपीआर अध्ययन दुई वर्षदेखि जारी रहेको छ।

    कम्पनीले विस्तृत आयोजना प्रतिवेदन दुई वर्षमा सम्पन्न गर्ने गरी केही समय अघिदेखि कार्य शुरु गरेको हो। गेजुवाले विद्युत् विकास समितिबाट इजाजत लिएर उक्त कार्य शुरु गरेको हो। कम्पनीले डीपीआरका लागि जाजरकोट नलगाडको चौखा, तल्लोबगर, बस्नेत गाउँ तथा रुकुमको मनकाबगर, त्रिवेणीलगायत स्थानमा ड्रिलिङ, माटो तथा ढुङ्गाखानी परीक्षणलगायत कार्य गरिरहेको छ।

    एसी पावर कम्पनीले आयोजनाको पहिचान तथा प्रारम्भिक सर्भे डिजाइनका लागि सात करोड रूपैयाँ खर्च गरिसकेको छ। ०६६ सालमा उक्त हाइड्रोपावर पहिचान भएको थियो। चार सय ८० मेघावाट क्षमताको भेरी–१ को नलगाड नगरपालिका– १२ चौखास्थित तल्लो छहरामा पावर हाउस बन्ने भएको छ। यसका लागि जाजरकोट, रुकुम र डोल्पाको सीमास्थित मनकाबगरमा ६० मिटर उचाइको ड्याम बन्नेछ भने पावर हाउससम्म १५ किलोमिटर सुरुङ (टनेल) निर्माण हुनेछ।

    त्यस्तै २४१ मेघावाट विद्युत् उत्पादन क्षमताको भेरी–२ का लागि चौखामा ३५ देखि ४० मिटर उचाइको बाँध तथा १३ किमि सुरुङमार्ग र नलगाड–७ चामाखेतमा पावर हाउस निर्माण हुने भएको छ। गेजुवाले डीपीआर निर्माण गर्न ५० करोड रूपैयाँ लाग्ने जनाएको छ। भेरी नदीमा जलाशययुक्त आयोजनाहरू निर्माणका लागि अध्ययन सुरु भएको आयोजनाका रामकाजी थापाले जानकारी दिए।

    भेरी–१ र भेरी–२ आयोजना निर्माणका क्रममा चार सय रोपनी जग्गा अधिग्रहण गर्नुपर्ने छ। भेरी–१ का लागि एक खर्ब र भेरी–२ का लागि ५० अर्ब रूपैयाँ लाग्ने अनुमान गरिएको छ। डीपीआर सम्पन्न भएलगत्तै भेरी–१ तथा भेरी–२ आयोजना निर्माण चरणमा जाने र अबको १० वर्षमा विद्युत् उत्पादन हुने आयोजनाले बताएको छ।

    भेरी नदीमा जलविद्युत् आयोजना निर्माणका लागि स्वदेशी तथा विदेशी लगानीकर्ता आकर्षित भएका छन्। भेरी नदीमा खेर गइरहेको पानीबाट विद्युत् उत्पादन गर्न सके कर्णाली प्रदेशको विकास र समृद्धि हुने दाबी गरिएको छ। स्रोत र साधनका हिसाबले धनी रहेको यस प्रदेशमा जलविद्युत् उत्पादनका लागि सरकारी तथा निजी लगानी वृद्धि गर्नुपर्ने प्रदेशसभा सदस्य गणेशप्रसाद सिंहको भनाइ छ।

    ‘नलगाड हाइड्रो पावर, छेडागाड जलविद्युत –१, भेरी–२, भेरी–३, भेरी–४ लगायत जलविद्युत् आयोजना निर्माणपछि जाजरकोट मात्र नभई समग्र कर्णालीकै मुहार बदलिने छ’, उनले भने। भेरी नदीमा पाँच हजार र सानी भेरीमा दुई हजार मेघावाट जलविद्युत् उत्पादन क्षमता रहेको नलगाड जलविद्युत् आयोजनाका इञ्जिनीयर पदम थापाले बताए।

हेमन्त केसी

 केसी थाहा खबरका जाजरकोट समाचारदाता हुन्। 

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]