जनतामा आशाको सञ्‍चार गराउन नसकेको आरोप

|

काठमाडौं : नेपाली कांग्रेसका केन्द्रीय सदस्य गगनकुमार थापाले प्रधानमन्त्री केपी शर्मा ओलीलाई विभिन्‍न ११ प्रश्‍न सोधेका छन्।

प्रतिनिधिसभाका सांसद रहेका थापाले प्रधानमन्त्री ओलीले मंगलबार गरेको सम्बोधनमा असन्तुष्टि जनाउँदै प्रधानमन्त्रीलाई खुलापत्र लेखेर प्रश्न सोधेका हुन्।  

नेता थापाले प्रधानमन्त्री ओलीको आत्मविश्वासको प्रशंसा गर्दै कोरोना भाइरसविरुद्धको लडाइँमा सरकारको प्रयासबारे पनि प्रश्‍न उठाएका छन्। उनले प्रधानमन्त्रीलाई जनताले सामाजिक सञ्जाल बाहेक अन्य उपायबाट प्रश्‍न सोध्न नपाएको पनि गुनासो गरेका छन्।

नेता थापाले प्रधानमन्त्री ओलीले राष्ट्रका नाममा गरेको सम्बोधनले उनमा आत्मविश्वास देखाए पनि त्यसले जनतामा भने कुनै विश्‍वास र आशाको सञ्‍चार गराउन नसकेको बताएका छन्।

'कोरोना भाइरसविरुद्ध जुध्न सरकारले गरेको लकडाउनलाई निरन्तरता दिन जनता तयार छन्। तर यही लकडाउनमा श्रमिक, मजदुर र दैनिक काम गरेर छाक टार्नुपर्ने नागरिकलाई राहत दिनु जरुरी छ', उनले भनेका छन्, 'सरकारका सबै प्रयासले मुलुकलाई चाँडोभन्दा चाँडो लकडाउनबाट बाहिर निकाल्ने तयारीमा प्रश्न उठाउने ठाउँछ, सरकारका काम शंकास्पद छ।'

प्रधानमन्त्रीले मंगलबार गरेको सम्बोधनमा सरकारले कांग्रेससहितका दलहरुसँग सहकार्य गर्न नचाहेर दम्भ देखाएको सन्देश जनतामा गएको पनि गगनले जिकिर गरेका छन्।

'म फेरि भन्छु, संकटको घडीमा सरकारको नेतृत्वलाई हामीले बलियो साथ दिन्छौँ। त्यसका लागि विश्वासको वातावरण बनाउनुपर्छ, अप्रिय प्रश्न गर्ने र सहिष्णु जवाफ पाउने स्वतन्त्रता हामीलाई, नागरिकलाई हुनुपर्छ,' उनले अगाडि भनेका छन्, 'राज्य थप जवाफदेही हुँदै संकटबाट सहजीकरणको बाटोमा जानुपर्ने अवस्थामा जीवन र वैयक्तिक स्वतन्त्रतामध्ये एक चयन गर्न आग्रह गरेर तपाईँले अवाक् बनाइदिनुभयो।'

उनले वैयक्तिक स्वतन्त्रताबिनाको जीवन कल्पना गर्न नसकिने पनि उल्लेख गरेका छन्। 'तपाईंले सोचेर 'जीवन वा वैयक्तिक स्वतन्त्रत'मध्ये एक रोज्न आग्रह गर्नु भएको हो?', उनले सोधेका छन्, 'के वैयक्तिक स्वतन्त्रताबिनाको जीवनको कल्पना गर्न सकिएला? प्रधानमन्त्रीज्यू!'

गगनले सोधेका ११ प्रश्‍न?

१. प्रधानमन्त्रीज्यूले "सातै प्रदेशका १० परीक्षण केन्द्रमा PCR प्रविधिबाट र संक्रमणको उच्च जोखिम भएका जिल्लाहरूमा द्रुत परीक्षण (RDT) को माध्यामबाट हजारौंको परीक्षणको तयारी भइरहेको" भन्नुभएको छ, जुन सराहनीय छ। तर र्‍यापिड टेस्टको गुणस्तर र तयारीका सन्दर्भमा आमतहमा मात्र होइन विज्ञहरूले समेत व्यापक चिन्ता व्यक्त गरिरहेका छन्।

सरकारसँग यस्तो र्‍यापिड टेष्ट गर्ने किट र उपकरणको गुणस्तरको सुनिश्चितताको आधार के हो?

र्‍यापिड टेष्टको प्रोटोकल तयार छ कि छैन?

नमुना संकलन गर्ने विधि र प्रक्रिया कस्तो हुन्छ?

र्‍यापिड टेष्ट कहिले देखि कहाँ-कहाँ शुरु गर्ने योजना छ?

परीक्षणका लागि आवश्यक जनशक्ति, तालिम र सुरक्षाको तयारी कस्तो छ?

२. Contact Tracing र अभिलेख संकलनको अवस्था के छ? यसका लागि के-कस्तोप्रणाली बनाइएको छ? संकलन गर्ने टिम कति छन्? तिनलाई के-कस्तो तालिमदिइएको छ? विभिन्न स्थानबाट संकलन गरिएको तथ्याङ्कमा एकरुपता छ कि छैन? त्यस्तो तथ्यांक विश्लेषण तथा तथ्याङ्कको प्रयोग गर्न सक्ने संयत्र के-कस्तो छ?

३. प्रधानमन्त्रीज्यूले "नेपाल-भारत सीमामा रहेका नेपालीलाई सिमापारी नै क्वारेन्टिनमा राखिएको" भन्नुभयो। तर अहिले पनि सीमामा अलपत्र हजारौं नेपाली भोक, त्रास र अपहेलनाले अपमानित र आक्रोशित अवस्थामा छन्। एउटै हलमा पचासौंको संख्यामा कोचिएर बस्नुलाई ‘सुरक्षित क्वारेन्टिन" ठान्न अस्वीकार गर्दै प्रत्येक दिन सयौंको संख्यामा जोखिमपूर्ण ढंगले जसरी तसरी नेपाल छिरेर दूरदराजका गाउँसम्म पुगिरहेका देशवासीका बारेमा प्रधानमन्त्रीज्यू शायद जानकार हुनुहुन्न। यसरी जोखिम उठाउने बाध्यता उनीहरूको लागि अन्याय मात्र होइन, लुकिछिपी आँउदा हाम्रो संयन्त्रले आवश्यक सूचना नै नपाउने हुँदा नेपालभित्र संक्रमणको जोखिम समेत झन बढ्दैन र? सीमामा रोकिएर अमानवीय परिस्थित सामना गरिरहेका वा अवैध ढङ्गले आफ्नै देश छिर्न ज्यान जोखिममा पारिरहेका नेपालीलाई सीमित नाकाखुला गरेर भित्र्याउँदै अनिवार्य क्वारेन्टिनमा बस्ने प्रबन्ध गर्ने बारे नेपाल सरकारले नसोचेको हो वा नचाहेको हो? होइन भने तपाईँकै भनाइ अनुसार क्वारेन्टिनका लागि देशमा ३० हजार बेड उपलब्ध छ, जसमध्ये हालसम्म ९ हजारमात्र प्रयोगमा आएको छ। त्यसो हो भने सीमामा अड्किएका जम्मा तीन हजार दाजुभाइ दिदीबहिनीलाई भित्र ल्याएर क्वारेन्टिनको न्यानो र सुरक्षा किन नदिने? अभर पर्दा हामीलाई हेर्ने सरकार छ भन्ने अनुभूति किन नदिलाउने?

४. नेपाल-भारत सीमाबाहेक पनि हजारौंको संख्यामा नेपालीहरु भारतका विभिन्न स्थानमा अलपत्र परेर कठीन जीवन बिताउन बाध्य छन्। यसरी अलपत्र परेका अधिकांश नेपालीहरु भारतको लकडाउन सकिने बित्तिकै नेपाल छिर्ने निश्चित छ। यसरी निकट भविष्यमै ठूलो संख्यामा नेपाल भित्रिन सक्ने नागरिकहरूको व्यवस्थापनका सन्दर्भमा नेपाल सरकारको तयारी र योजना के छ?

५. सम्माननीय राष्ट्रपतिज्यू तथा प्रधानमन्त्रीज्यूले अन्य राष्ट्रका राष्ट्र प्रमुख तथा सरकार प्रमुखसँग गरेको वार्ताको कुटनैतिक महत्व अवश्य पनि छ तर उनीहरू आफैं महासंकटसँग जुधिरहेको अवस्थामा हाम्रा नागरिकको सुरक्षा तिनको प्राथमिकतामा पर्दैन। विभिन्न राष्ट्रहरुमा रहेको नेपाली दुतावासहरुले रोजगारीको सिलसिलामा सुदूर प्रवासमा रहेका लाखौं नेपालीहरुको सुरक्षार्थ के-कस्तो योजना र व्यवस्थाका साथ काम गरिरहेका छन्?

६. प्रधानमन्त्रीज्यूले "सातै प्रदेशमा उपचारमा आवश्यक पर्ने सुरक्षासामग्रीको व्यवस्था मिलाइएको" भन्नु त भयो तर अग्रभागमा रहेर जोखिममा काम गरिहेका धेरै स्वास्थ्यकर्मीले अहिले पनि न्यूनतम सुरक्षा सामाग्री नपाएका समाचारले हाम्रो मिडिया भरिएको छ। व्यक्तिगत सुरक्षा सामाग्री(PPE) उपलब्धतताको स्थिति कस्तो छ, कति जगेडा छ, कहिलेसम्म धान्छ? कति मात्रामा संकलन वा खरिद वा उत्पादन गर्ने योजना सरकारले गरेको छ?

७. प्रधानमन्त्रीज्यूले "भेन्टिलेटर सहित अपुग सामाग्री र उपकरणको प्रबन्ध गरिँदै छ" भन्नुभएको छ। सम्भाव्य जोखिमलाई मध्येनजर गर्दै अस्पताल केन्द्रित तयारीका लागि काठमाडौं उपत्यका र प्रदेशहरूमा जनशक्ति, उपकरण, औषधि र पूर्वाधार लगायतका सन्दर्भमा सरकारले कहाँ कहाँ के कस्तो प्रबन्ध गरिरहेको छ? हाम्रो नियमित स्वास्थ्य सेवा प्रभावित हुँदा अन्य रोगबाट पीडितहरूले उपचारबाट बञ्चित हुने अवस्था आउन नदिन सरकारको के तयारी र योजना छ?

८. स्वास्थ्यकर्मीसँगै सुरक्षाकर्मीहरु पनि अग्रभागमा रहनु पर्ने अवस्थाछ। सुरक्षाकर्मीहरुको जीवन र वासस्थानको सुरक्षाका सन्दर्भमा सरकारलेके-कस्तो योजना र व्यवस्था गरेको छ?

९. सरकारले कृषि कार्यलाई निरन्तरता दिने उपयुक्त उपायको खोजी गरेको रअवलम्बन गरेको भन्नुभयो? यो कस्तो उपाय हो र कहाँ र कसरी अवलम्बन भएको छ?

१०.सरकार राज्यका विभिन्‍न संयन्त्रहरुको तर्कसंगत उपयोग गर्ने मामिलामा पनि चुकेको छ। विपदको यो अवस्थामा सैन्य संयन्त्रको विशेषज्ञता, निपुणतातथा जिम्मेवारी पनि रहेको क्षेत्रमा त्यसलाई उपयोग नै गरिएन, तर भरसक सहभागी नै गराउन नहुने खरिद प्रक्रियामा भने सेनाको सहयोग मागिएको छ। स्वास्थ्य सामाग्री खरिद प्रकरणमा देखिएको कमजोरी र अनियमिताका कारण यो संकटमा हामीले गर्नुपर्ने तयारी प्रभावित भएकोमा जनताद्वारा व्यक्त व्यापक चिन्ता र आक्रोश तपाईंका लागि आधारहीन र प्रायोजित आरोप मात्र हुन?

११. कोरोना भाइरस संक्रमणविरुद्धको यो लडाईंमा तपाईँले आम नागरिक, प्रतिपक्ष सबैको ठूलो साथ र सहयोग पाइरहनु भएको छ। तर पनि पूर्वाधार निर्माणमा भएको कमजोरीका कारण संक्रमण ढिलो सुरु भएर तयारीका लागि हामीले पाएको अमूल्य समय त्यसै खेर गएको छ। यी चुनौतीहरूको पहिचान गर्दै केही कुरामा सच्याएर अघि बढौं भन्दा ‘निहीत स्वार्थ पूरा गर्न चलाइएका प्रचारबाजी र बेमौसमी बाजा" भनेर आक्षेप त लगाउनु हुन्‍न?

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.