प्रदेश ५ को राजधानी दाङ पक्कापक्की ! कांग्रेसको विरोध कायमै

काठमाडाैं : प्रदेश ५ सरकारले प्रदेशको राजधानी दाङको भालुवाङ र  नाम लुम्बिनी राख्ने प्रस्ताव प्रदेश सभामा पेस गरेको छ।

प्रदेश आन्तरिक मामिला तथा कानुन मन्त्रालयले प्रदेशको राजधानीसहित नामको प्रस्ताव प्रदेशसभामा पेस गरेको भौतिक योजना तथा पूर्वाधारमन्त्री बैजनाथ चौधरीले थाहाखबरलाई जानकारी दिए। 

यसअघि आज बसेको प्रदेश मन्त्रिपरिषद् बैठकले दाङको भालुवाङ बजारलाई केन्द्रमा राखेर दाङको राप्ती, गढवा र  अर्घाखाँचीको शीतगंगा गाउँपालिकालाई जोडेर प्रदेश राजधानी बनाउने निर्णय गरेको थियो।

सोही निर्णयलाई सरकारले प्रदेशसभामा पेस गरेको हो। अब यस विषयमा प्रदेशसभामा छलफल गरी प्रक्रियामा जाने मन्त्री चौधरीले जानकारी दिए। यसअघि सत्तारुढ नेपाल कम्युनिष्ट पार्टी (नेकपा) का अध्यक्षद्वय केपी शर्मा ओली र पुष्पकमल दाहाल प्रचण्डबीच दाङमा राजधानी राख्ने सहमति जुटेको केही समयमै प्रदेश मन्त्रीपरिषद्ले यस विषयमा निर्णय लिएको हो।

दुई अध्यक्षबीच दाङको भालुवाङमा स्थायी राजधानी बनाउने सहमति भएको र त्यसअनुसार प्रदेशमा निर्देशन गएको बताइएको छ। नेकपाका महासचिव विष्णु पौडेलसहित केही नेताले प्रदेश राजधानी अहिलेको अस्थायी मुकाम बुटवलमै कायम गर्नुपर्ने अडान राख्दै आएका थिए।

नेपालको संविधानले प्रदेश राजधानी र प्रदेशको नाम तोक्ने अधिकार प्रदेश सभालाई दिएको छ। प्रदेश सभाले स्थायी राजधानी र नामबारे निर्णय गर्न कार्यदल गठन गरेको थियो।

प्रदेश सभाको बैठक असोज १९ गते बोलाइएको छ। प्रदेशसभा सचिव दुर्लभ कुमार पुनले आज प्रदेशको राजधानी तथा नामकरणको प्रस्ताव दर्ता भएको र आगामी १९ गते बस्ने बैठकबाट यसमा छलफल हुने बताए। उनका अनुसार प्रस्तावमाथि अन्तिम टुंगो लगाउन १९ गते मतदान हुने प्रदेशसभा सचिवालयले कार्यसूची बनाएको छ।

प्रस्ताव पारित हुने पक्काजस्तै

यो प्रस्ताव पारित हुने पक्का भएको छ। प्रदेशसभामा कुल ८७ जना प्रदेशसभा सदस्य छन्। सत्तारुढ दलको मात्रै ६१ सांसद छन्। कांग्रेसका १९ जना, जनता समाजवादीका ६ र राष्ट्रिय जनमोर्चाका एक सांसद मात्रै छन्। प्रस्ताव पारित गर्न दुई तिहाई आवश्यक पर्छ। यो भनेको पक्षमा ५८ सांसद आवश्यक पर्छ। नेकपा एक्लैको ६१ सांसद छन्। यसकारण यो प्रस्ताव सहजै पास हुने देखिन्छ।

नेकपा संसदीय दलको बैठक बस्दै ह्विप जारी हुने

प्रदेशको राजधानी र नामको प्रस्ताव संसदमा पेस गरेपछि सत्तारुढ नेकपाले संसदीय दलको बैठक बोलाएको छ। भोलि(शनिबार) बिहान ८ बजेका लागि संसदीय दलको बैठक डाकिएको जनाइएको छ। बैठकमा प्रस्तावका पक्षमा प्रदेशसभामा मतदान गर्न प्रदेश कमिटीले ह्विप जारी गर्न बैठक बोलाएको हो। 

कांग्रेस रुपन्देहीको आपत्ति

प्रदेश ५ को स्थायी राजधानी दाङ रहनेबारे प्रदेश सरकारले गरेको प्रस्तावमा नेपाली कांग्रेस रुपन्देहीले आपत्ति जनाएको छ। कांग्रेस जिल्ला सभापति अब्दुल रज्जाकद्वारा जारी विज्ञप्तिमा 'संसदीय मर्यादाविपरीत विपक्षी सांसदहरुसँग छलफल नै नगरी बहुसंख्यक जनताको भावनालाई कुल्चिँदै गरिएको प्रस्तावले स्तब्ध र मर्माहत बनाएको छ,' भनिएको छ।

कांग्रेस रुपन्देहीले प्रदेश सरकारको यो प्रस्तावविरुद्ध चरणबद्ध आन्दोलनमा उत्रिन सबैलाई अपिल पनि गरेको छ। आन्दोलनबाट भएको क्षतिको जिम्मेवारसमेत सरकार हुने चेतावनी कांग्रेसले दिएको छ।

यसैबीच कांग्रेस समर्थित नेपाल विद्यार्थी संघले रुपन्देहीको बुटवलमा यही विषयलाई लिएर आन्दोलन चर्काएको छ। दिउँसो नेविसंघले रुपन्देहीले दाङ राजधानी बनाउने विरोधस्वरुप ​सरकारी गाडी तोडफोड गर्नुका साथै ठाउँठाउँमा टायर बालेर प्रदर्शनसमेत गरेको छ। 

देउवा सरकारको पालामा गरिएको निर्णय नै उचित भएको र यसविपरीत अहिलेको सरकार गए सडकदेखि सदनसम्म चेतावनी नेविसंघले दिएको छ।