रुकुम (पूर्व) : तीन वटा गाउँपालिका मात्र रहेको यस जिल्लामा ३५ मतदान स्थल र ४९ मतदान केन्द्र कायम गरिएको थियो। जसमा जिल्लाभरका मतदाताको संख्या ३३ हजार ५ सय १८ रहेको थियो।
जस अनुसार भूमे गाउँपालिकामा ६७ दशमलव ९२ प्रतिशत मत खसेको छ। आज शुक्रबार देशैभर भएको २०७९ स्थानीय तह निर्वाचनमा भूमे गाउँपालिकामा ६७ दशमलव ९२ प्रतिशत मत खसेको हो।
९ वटा वडा रहेको भूमेमा कुल मतदाता संख्या ११ हजार ३ सय ५२ रहेकोमा ७ हजार ७ सय १० मत खसेको निर्वाचन अधिकृत विमल प्रसाद बरालले जानकारी दिए। प्रतिशतमा ६७ दशमलव ९२ हुन आएको बरालले बताए। भूमेमा ९ मतदान स्थल र १५ मतदान केन्द्र कायम गरिएको थियो।
यसैगरी पुथाउरगंगा गाउँपालिकामा मतदान स्थल १५ र मतदान केन्द्र १९ कायम गरिएको थियो। जसमा १४ वटा वडा रहेको पुथाउत्तरगंगामा कुल मतदाता संख्या ११ हजार २ सय ५३ रहेकोमा ८ हजार ३ सय ६८ मत खसेको जिल्ला निर्वाचन अधिकारी तेजकुमार ओलीले जानकारी दिए। जसमा ७४ दशमलव ३६ प्रतिशत मत खसेको ओलीले बताए।
यस्तै, सिस्ने गाउँपालिकामा मतदान स्थल ११ र मतदान केन्द्र १५ कायम तोकिएको थियो। जसमा ८ वटा वडा रहेको सिस्नेमा कुल मतदाता संख्या १० हजार ९ सय १३ रहेकोमा ८ हजार ६६ मत खसेको ओलीले बताए। प्रतिशतमा ७३ दशमलव ९१ मत खसेको छ। विभिन्न वडाबाट मतपेटिका आउने क्रम जारी रहेको जिल्ला निर्वाचन कार्यालयले जनाएको छ।
तपाईंको ईमेल गोप्य राखिनेछ ।