पाेखरा : प्रतिनिधिसभा तथा प्रदेशसभा सदस्यका लागि आज भएको निर्वाचनमा गण्डकी प्रदेशका सबै जिल्लामा मतदान जारी छ।
प्रदेशअन्तर्गतका सबै जिल्लामा मतदान जारी रहेको भएको प्रदेश निर्वाचन कार्यालय, पोखराका प्रमुख होमनाथ पराजुलीले बताए। उनका अनुसार अत्यन्त चिसो हुने हिमालपारिका जिल्ला मनाङ, मुस्ताङमा पनि मतदान सुरु भइसकेको छ।
गण्डकी प्रदेशमा आजको निर्वाचनका लागि कुल १६ लाख ६२ हजार २४६ मतदाता सहभागी बन्दैछन्। हिमालपारिका जिल्ला मनाङ, मुस्ताङदेखि पहाडी जिल्ला कास्की, तनहुँ हुँदै तराईको जिल्ला नवलपुरसहित ११ वटा जिल्लामा समेटिएको गण्डकीमा यो पटकको निर्वाचनमा आठ लाख ६९ हजार पाँच सय ३८ जना महिला, सात लाख ९२ हजार ६९७ जना पुरुष र ११ अन्य मतदाता छन्।
छिमेकी दुई ठूला राष्ट्र चीन र भारतसम्म सिमाना जोडिएको यो प्रदेशमा निर्वाचनबाट प्रत्यक्षतर्फ प्रतिनिधिसभाका लागि १८ वटा निर्वाचन क्षेत्र र प्रदेश सभातर्फ ३६ वटा निर्वाचन क्षेत्रमा चुनावी प्रतिस्पर्धा हुँदैछ। निर्वाचनका लागि प्रदेशमा २८ हजार कर्मचारी परिचालन भएको प्रदेश निर्वाचन कार्यालय पोखराका सूचना अधिकारी रुद्र न्यौपानेले जानकारी दिए।
तपाईंको ईमेल गोप्य राखिनेछ ।