लेखनाथ (कास्की) : पोखरा नयाँबजार निवासी प्रेमबहादुर क्षत्री दशैँका लागि चिनी खरिद गर्न सोमबार दिउँसो पोखराको पृथ्वीचोकस्थित साल्ट ट्रेडिङ कर्पोरेशनको सहुलियत पसलको बिक्री केन्द्र पुगे। तर त्यहाँ चिनी नै बिक्रीमा नभएपछि रित्तो हात घर फर्कनुपर्यो।
‘उपभोक्तालाई लक्षित गरी काठमाडाैँमा सहुलियत पसलबाट चिनी बिक्री भइरहेको समाचार हेरेर पोखराको साल्ट ट्रेडिङले पनि बिक्री गरेको होला भन्दै आएको हुँ तर यहाँ चामल, नून, तेल र साबुन मात्र बिक्री भइरहेको रहेछ, मलाई चिनी चाहिएको हो,’ क्षत्रीले भने, ‘बजारमा चिनी खरिद गर्दा व्यापारीले प्रतिकेजी १३० रुपैयाँ लिने गरेका छन्।’
बजारमा दैनिक उपभोग्य वस्तुको मूल्यवृद्धि भएपछि सर्वसाधारणको दैनिकी कष्टकर हुँदै आएको उनको भनाइ छ।
सहुलियत दरमा खाद्यवस्तुको बिक्री गर्ने जिम्मा पाएको खाद्य व्यवस्था तथा व्यापार कम्पनी लिमिटेड पोखरा र साल्ट ट्रेडिङ कर्पोरेशन कम्पनी लिमिटेड पोखराको बिक्री केन्द्रले यसवर्ष चिनी नभएका कारण बिक्री गरिएको छैन।
‘सरकारले काठमाडौँ बाहिरका जिल्लामा पनि चिनी बिक्री केन्द्र राखेको भए आम उपभोक्ताले सहुलियत दरमा चिनी किन्न पाउने थिए, किन त्यसो नगरेको होला ?,’ क्षत्रीले प्रश्न गरे।
साल्ट ट्रेडिङ कर्पोरेशन कम्पनी लिमिटेड पोखराका प्रमुख वासुदेव उपाध्यायले उद्योग वाणिज्य तथा आपूर्ति मन्त्रालयले सहुलियत दरको चिनी बिक्री गर्ने निर्णय ढिला गर्दा दशैँमा चिनी आयात हुन नसकेको र दशैँपछि लगत्तै सहुलियत दरको चिनी बिक्री केन्द्रमा आइपुग्ने बताए।
‘दशैँमा उपभोक्तालाई सहुलियत दरमा चामल, तोरीको खाने तेल, नुहाउने साबुन र नून सहुलियत दरका दिएका छौँ,’ उनले भने, ‘सधैँ झैँ यसवर्ष पनि साल्ट ट्रेडिङको कार्यालय पृथ्वीचोकबाट उपभोग्य सामान बिक्री भइरहेका छन्।’
प्रमुख उपाध्यायका अनुसार साल्ट ट्रेडिङले २५ केजी तौल भएको जिरा मसिनो चामलको बोरालाई बजार भाउभन्दा ५ सय सस्तोमा २ हजार १ सय रुपैयाँमा बिक्री गरिएको छ।
२५ केजीको सोना चामल प्रतिबोरामा २५० रुपैयाँ छुट गरी १ हजार ७५० रुपैयाँमा बिक्री गरिएको छ। नूनमा २ रुपैयाँ सहुलियत दिइएको छ भने सन्तुर साबुनमा १० रुपैयाँ र बजार भाउ ४२५ रुपैयाँ रहेको शान्ति तोरीको तेल प्रतिलिटर ३७० रुपैयाँमा बिक्री गरिएको छ।
खाद्य व्यवस्था तथा व्यापार कम्पनी लिमिटेड प्रादेशिक कार्यालय पोखराका सूचना अधिकारी रञ्जना केसीले यसवर्ष चिनी नभएका कारण पोखराबाट स्टिम जिरा चामल बिक्री गरिएको जानकारी दिइन्।
उनका अनुसार २५ केजी तौल भएको चालमको बोरा १ हजार ९७५ रुपैयाँमा बिक्री भइरहेको छ। दशैँदेखि छठ पर्वसम्मका लागि ५ सय क्विन्टल चामल बिक्रीका लागि राखिएकोमा पोखराको पार्दीस्थित बिक्री केन्द्र र पृथ्वीचोकको बिक्री केन्द्रबाट दैनिक २० क्विन्टल चामल बिक्री भइरहेको केसीको भनाइ छ।
‘प्रतिपरिवार २ बोरा चामल दिएका छौँ,’ केसीले भने, ‘सहुलियत पसल यही असोज १५ गतेदेखि सुरु भई मंसिर ३ गतेसम्म रहने छ।’
विशेषगरी दशैँ, तिहार र छठ पर्वलाई लक्षित गरी सरकारले सञ्चालनमा ल्याएको सहुलियत पसलमा चामल खरिद गर्न दशैँसँगै सर्वसधारण उपभोक्ताको चाप बढेको उनको भनाइ छ।
सरकारले बोलपत्रमार्फत खरिद गर्न लागेको चिनी केही हप्तामा नै बिक्री केन्द्रमा आइपुग्ने र चिनीको समेत बिक्री गर्ने उनले बताए।
देशभर खाद्य व्यवस्था तथा व्यापार कम्पनीले ४९, साल्ट ट्रेडिङ कर्पोरेशनले ३५ र दुग्ध विकास संस्थानले ११ आउटलेटबाट सहुलियत मूल्यमा सामान बिक्री गरिरहेका छन्।
सञ्चालनमा ल्याइएका सहुलियत मूल्य पसल प्रभावकारी भए/नभएको विषयमा अनुगमन गर्न सरकारले अनुगमन समिति पनि बनाएको छ। सहुलियत पसलबाट धेरैभन्दा धेरै लाभ लिन केसीले उपभोक्तालाई आग्रह गरेका छन्।
तपाईंको ईमेल गोप्य राखिनेछ ।