कालिकोट : जिल्लाका अधिकांश स्थानीय तहका काम सदरमुकामबाट नै हुने गरेका छन्। गाउँगाउँमा पुगेको स्थानीय तहका सिंहदरबारहरूको योजना सम्झौता, रकम फरफरात सदरमुकाममा नै हुने गरेको हो।
गाउँगाउँमा पुगेका सिंहदरबारका कर्मचारीहरू स्थानीय तहमा नजादाँ तलब भत्ता, विकास योजनाको सम्झौता लगाएतका काम सदरमुकाममा नै हुने गरेको छन्।
कर्मचारी स्थानीय तहमा नगएर सदरमुकामा नै बसेका कारणले सानोतिनो काम पर्दा पनि सदरमुकाम नै धाउनु पर्ने बाध्यता रहेको नरहरीनाथ गाउँपालिका ९ लालुका रनबहादुर शाहीले बताए। उनले भने, ‘गाउँगाउँमा सिंहदरबार आएको भन्दै थिए, हाम्रीलाई सानासाना काम गर्न पनि सदरमुकाम आउनु पर्छ।’
हरेक काम सदरमुकाममा नै हुने भएका कारणले दैनिक जसो योजना सम्झौता गर्ने, आर्थिक वर्षको अन्तिम चौमासिक रकम बुझ्नेहरूको भीड नै लाग्ने गरेको स्थानीयको भनाइ रहेको छ।
सदरमुकाम नै भाडाका सम्पर्क कार्यालय
जिल्ला सदरमुकाममा स्थानीय तहका कार्यालय भाडाका घरबाट सञ्चालन भइरहेका छन्। जिल्ला ९ वटा स्थानीय तहले जिल्ला सदरमुकाम सम्पर्क कार्यालय संचालनमा ल्याएका छन्।
जिल्लाको सदरमुकाम रहेको खाँडाचक्र नगरपालिकाले मासिक ५० हजारको भाडाको घरमा कार्य सञ्चालन गरिरहेको प्रमुख जसीप्रसाद पाण्डेले बताए। कार्यालय व्यवस्थापन तथा कर्मचारी आवासका लागि घर भाडामा लिएको उनले बताए। उनले भने, ‘स्थानीय तह गठन भए तर भौतिक पूर्वाधार अपुग छ,अझै चार/ पाँच वर्ष त गाउँपालिकाका लागि आवश्यक पूर्वाधार निर्माणमै अलमल हुन्छ।'
जिल्लाको रास्कोट नगरपालिका पुरानो स्यूना गाविसको कार्यालयबाट सेवा सञ्चालन गरिएको भए पनि जनप्रतिनिधि तथा कर्मचारी आवासका लागि मासिक २० हजार भाडा तिर्ने गरी नौँ कोठे भवन भाडामा लिएको रास्कोट नगरपालिकाका प्रमूख प्रशासकीय अधिकृत कुलराज सुवेदीले बताए। उनले भने, ‘पुरानो गाविस कार्यालय र एक नीजि भवन भाडामा लिएर पनि साँघुरो भवनबाट सेवा प्रवाह गर्न बाध्य भएका छौंँ।’
तपाईंको ईमेल गोप्य राखिनेछ ।