काठमाडौं : राष्ट्रियसभाको बुधबारको बैठकमा राष्ट्रियसभा सदस्यहरूले समसामयिक विषय र क्षेत्रगत विषयमा सरकारको ध्यानाकर्षण गराएका छन्।
राष्ट्रियसभा बैठकको शून्य समयमा बोल्दै राष्ट्रियसभा सदस्य मायाप्रसाद शर्माले रकुम पश्चिमको त्रिवेणीमा २५ वर्षीया मनकला खत्रीको अज्ञात समूहले बलात्कारपछि हत्या गरेकोले दोषीलाई कारबाही गर्न माग गरे। उनले भने, ‘रुकुम पश्चिमको त्रिवेणी वडा नं. ४ छहरे बस्ने २५ वर्षीय मनकला खत्रीलाई अज्ञात समूहले घाँस काट्न गएको बेला बलात्कार गरेर हत्या गरेको छ। यसको उचित छानविन गरी उचित न्यायको निमित्त सरकारसँग माग गर्दछु।’
राष्ट्रियसभा सदस्य विमला घिमिरेले वर्तमान सरकारले राष्ट्रपति शैक्षिक सुधार कार्यक्रमले धेरै विद्यालयहरू लाभान्वित भएको भए पनि वर्तमान सरकारले सो कार्यक्रमअन्तर्गतको रकम रोक्न लागेको भन्दै त्यसो नगर्न सचेत गराइन्। उनले भनिन्, ‘राष्ट्रपति शैक्षिक सुधार कार्यक्रमअन्तर्गतको रकम सरकार फेरिएसँगै त्यो रकम खर्च नहुने हो कि भन्ने कुरा सबैतिर शंकाको विषय रह्यो।’
राष्ट्रियसभा सदस्य डा. विमला राई पौड्यालले देशमा धेरै घरेलु श्रमिक रहेको र उनीहरूलाई कोभिड १९ को जोखिम रहेको भन्दै वडा तहमा घरेलु श्रमिकको पञ्जिकरण गरी परिचय पत्र दिन र कोभिड १९ विरुद्धको खोप दिन अनुरोध गरिन्।
उनले भनिन्, ‘हाम्रो देशमा घरेलु श्रमिकको धेरै ठूलो जमात छ र घरेलु श्रमिक औपचारिक, अनौपचारिक कुनै पनि क्षेत्रमा देखिनु हुन्न। उहाँहरूले काम गर्ने वातावरण पनि प्राय जोखिमपूर्ण नै हुन्छ। अहिलेको यो कोभिड १९ को महामारीमा जोखिम झन बढेको छ। त्यसले गर्दा संघीयतासम्बन्धी हेर्ने मन्त्रालयले वडा स्तरमा घरेलु श्रमिकको पञ्जिकरण गर्ने, उनीहरूलाई परिचयपत्र दिने र खोप लगाउनको लागि प्राथमिकताको साथ काम गरोस् भनेर म अनुरोध गर्न चाहन्छु।’
राष्ट्रियसभा सदस्य शारदादेवी भट्टले निर्मला हत्याकाण्डका दोषी पत्ता किन लागेनन् भनी प्रश्न गरिन्। उनले यो घटना रहस्यमय भएको भन्दै दोषीलाई छानविन गरी जन्मकैदको सजाय हुनुपर्ने माग गरिन्। उनले भनिन्, ‘नेपाल सरकारलाई दबाब र अनुरोध गर्दछु कि निर्मला हत्याकाण्ड किन बाहिर आउँदैन? यसको के रहस्य छ? नेपालका दिदीबहिनी, चेलीबेटी धेरै बेहालमा छन्। गरिबकै छोरी भएकाले पत्ता नलागेको हो कि? माग गर्न चाहन्छु यो रहस्यमय भयो, यदि पत्ता लागिहाल्यो भने ती दोषीलाई छानविन गरी जन्मकैदको सजाय होस् भन्ने माग गर्दछु।’
राष्ट्रियसभा सदस्य सिंहबहादुर विश्वकर्माले नागरिकता विधेयक छिटोभन्दा छिटो पारित गर्न माग गरे। उनले भने, ‘नागरिकताको विधेयकलाई जतिसक्यो छिटो पारित गर्नेगरी प्रक्रिया अगाडि बढाउन सम्माननीय अध्यक्षज्यूमार्फत् सम्बन्धित निकाय र अधिकारीहरूको ध्यानाकर्षण गराउँदछु।’
जनगुनासो र राष्ट्रियताको संरक्षण हुनेगरी विधेयक पास गराउनुपर्नेमा उनको जोड छ। राष्ट्रियसभाको अर्को बैठक साउन १८ गते बस्नेछ।
तपाईंको ईमेल गोप्य राखिनेछ ।