काठमाडौं : यस वर्ष विभिन्न समयमा आएको बाढीपहिरोका कारण देशभर २९ जना बेपत्ता भएका छन्। नेपाल प्रहरीको तथ्यांकअनुसार गत ३१ जेठदेखि आजसम्म बाग्मती प्रदेशमा २५, गण्डकीमा दुई र लुम्बिनी र सुदूरपश्चिम प्रदेशमा एक/एकजना बाढीका कारण बेपत्ता भएका हुन्।
गत ३१ जेठमा सुदूरपश्चिम प्रदेश बाजुराका १२ वर्षीय बालक कमल बुढा बाढीमा बेपत्ता भएका छन्। गत १ असारमा मेलम्ची नदीमा आएको बाढीले सिन्धुपाल्चोकका १५, भारतका दुई, झापाका एक, रुपन्देही एक र चीनका एकजना बेपत्ता भएका छन्।
विवरणअनुसार सिन्धुपाल्चोकमा बाढीबाट बेपत्ता हुनेमा माधव भण्डारी, गणेश ज्योति, टिकामाया खड्का, ज्ञानेन्द्र कक्षपति, सुरेन्द्र नेपाल, च्याङा तामाङ, काली तामाङ, साइँली तामाङ, पूर्ण तामाङ, कामी तामाङ, नोर्की तामाङ, गीता थापा, सदिप थापा, तस्बिर तामाङ र भीमबहादुरी भण्डारी छन्। सोही बाढीबाट भारतका विजया बासमूर्ति र जिनडाओ बासमूर्ति, रुपन्देहीका रेशमलाल सार्की, झापा होमराज घिमिरे र चीनका सन यु चुवान बेपत्ता भएका छन्।
गत १७ असारमा पहिरोका कारण चितवन राप्ती नगरपालिका–१२ का कृष्णलाल चेपाङ, निशा चेपाङ, मोतीलाल चेपाङकी नातिनी बेपत्ता भए। गत २३ असारमा बागलुङको ताराखोला गाउँपालिका–३ मा पहिरो जाँदा स्थानीय राजेन्द्र कार्की र पर्वतको कुश्मा–८मा आएको बाढीले राजाराम आचार्य बेपत्ता भएका प्रहरीले जानकारी दिएको छ।
यस्तै, ३० असारमा रुपन्देहीको सैनामैना–१० मा आएको बाढीले सुजन न्यौपाने बेपत्ता भए। गत ११ भदौमा सिन्धुलीको मुर्किबेसी वितिजोर खोलामा आएको बाढीले गोलन्जर–२ का पूर्णबहादुर कार्की र १८ भदौमा मकवानपुरको हेटौडा–१७ शिवम् सिमेन्ट उद्याेग नजिक आएको बाढीले बगाएर बद्री कार्की बेपत्ता भएको प्रहरी प्रधान कार्यालयले जनाएको छ। यस अवधिमा खोलाले बगाएर बेपत्ता हुनको संख्या पनि थुप्रो छ तर त्यो संख्या यसमा समेटिएको छैन।
त्यस्तै गएको ३० जेठदेखि वर्षा, बाढीपहिरोको कारण आजसम्म १२२ जनाको मृत्यु भएकाे नेपाल प्रहरीको तथ्याङ्कले देखाएको छ। जसमा १ सय ४२ जना घाइते छन् भने ९ सय ८३ वटा घरमा क्षति पुगेको छ।
तपाईंको ईमेल गोप्य राखिनेछ ।