स्पेनिस ला लिगा फुटबलमा बार्सिलोना र सभियाले जित निकलेका छन्। बार्सिलोनाले इल्चेमाथि ३-२ को जित निकाल्दा घरेलु मैदानमा सेभियाले एट्लेटिको म्याड्रिडलाई २-१ ले पराजित गर्यो।
सेभियाको जितमा इभान राकिटिक र लुकास ओकम्पोसले गोल गरे। एट्लेटिकोका फिलिपेले एक गोल फर्काए। प्रतिस्पर्धात्मक खेलमा सेभियाले सातौं मिनेटमै अग्रता बनाएको थियो। राकिटिकले करिम रिकिकको पासमा गोल गरेका थिए।
३३औं मिनेटमा फिलिपेले बराबरी गोल गर्दै एट्लेटिकोलाई खेलमा फर्काउने प्रयास गरे। फिलिपेले थोमस लेमारको पासमा गोल गरेका थिए। तर‚ ८८औं मिनेटमा लुकास ओकम्पोसले जुलेस कोन्डेको पास गोल गर्दै सेभियालाई जिताए।
जितसँगै सेभियाले दोस्रो स्थान थप बलियो बनाएको छ। १७ खेलमा सेभियाको ३७ अंक छ। पराजित एट्लेटिको २९ अंकसहित पाँचौं स्थानमा झरेको छ। शीर्षस्थानमा रहेको रियल म्याड्रिडको ४२ अंक छ।
त्यस्तै‚ घरेलु मैदानमा बार्सिलोनालाई जिताउन फेरान जुटग्ला, पाब्लो गाभिरा र निकोले गोल गरे। इल्चेका टेटे मोरेन्टे र पेरे मिल्लाले गोल गरेका थिए। जारी सिजन खराव लयबाट गुज्रिएको बार्सिलोनाको पछिल्लो पाँच खेलमा यो पहिलो जित हो। बार्सिलोनाले १६औं मिनेटमा फेरानको गोलमा अग्रता लिएको थियो। पाब्लोले १९औं मिनेटमा गोल गर्दै बार्सिलोनाको अग्रता दोब्बर बनाए ।
दोस्रो हाफमा खेलमा फर्किएको इल्चेले दुई मिनेटको अन्तरमा दुई गोल गर्दै खेललाई बराबरीमा ल्यायो। ६२औं मिनेटमा टेटे मोरेन्टे र ६३औं मिनेटमा पेरे मिल्लाले गोल गरेपछि खेलले रोचक मोड लिएको थियो ।
त्यसपछि ८५औं मिनेटमा निकोले पाब्लो गाभिराको पासमा गोल गर्दै बार्सिलोनालाई रोमाञ्चक जित दिलाए। निको ‘म्यान अफ दी म्याच’ भए। जितसँगै १७ खेलबाट २७ अंक बनाएको बार्सिलोना सातौं स्थानमा छ। पराजित इल्चे १५ अंक सहित १६औं स्थानमा छ।
तपाईंको ईमेल गोप्य राखिनेछ ।