काठमाडौं : भौतिक पूर्वाधार तथा यातायात मन्त्री रेणुकुमारी यादवले मन्त्रालयको काममा खट्ने इन्जिनियरहरूको अभावको कारण विकास निर्माणले तीव्रता दिन नसकेको बताएकी छन्।
सोमबार भएको प्रतिनिधि सभा अन्तर्गतको अर्थ समितिको बैंठकमा मन्त्री यादवले मन्त्रालयमा काममा खट्ने इन्जिनियरहरूको अभावको कारण विकास निर्माणको काम तीव्र गतिमा अगाडि बढ्न नसकेको बताएकी हुन्।
मन्त्री यादवले पूर्वाधार निर्माणको काममा खट्ने इन्जिनियरहरूको अभाव भएको र भएका इन्जिनियरहरू पनि पढाइलगायत विभिन्न बिदा लिएर काठमाडौंमा बस्न थालेकाले अझ बढी समस्या भएको बताइन्।
उनले यसरी विकास निर्माणको काममा खट्नु पर्ने इन्जिनियरहरू अत्यावश्यकबाहेक बिदामा नबसेर तत्काल काम गर्न आग्रहसमेत गरिन्। पढाइको लागि छुट्टिमा मन्त्रालय तथा मन्त्रालय मातहतका ८० भन्दा बढी इन्जिनियरहरू बिदामा रहेको उनले जानकारी दिइन्।
उनले भनिन्,‘पछिल्लो समय मन्त्रालयमा कर्मचारी अभाव छ। जसका कारण विकास निर्माणका योजनाहरू अगाडि बढ्न सकेका छैनन्। योजनाहरू अगाडि बढ्न नसक्दा पुँजीगत खर्च बढ्न सकेको छैन। त्यस्तै पछिल्लो समय पूर्वाधार निर्माणका लागि फिल्डमा खटिनुपर्ने इन्जिनियरहरू बिदामा बसेका छन्। त्यसले पनि १० जनाले गर्ने काम एक जनाले गर्नुपर्ने परिस्थिती छ।’
त्यस्तै कृषि तथा पशुपन्छी विकास मन्त्री महिन्द्र राय यादवले कृषि मन्त्रालय अन्तर्गतका ठूला कृषि परियोजनाको काम गर्न कर्मचारी अभाव भएको बताए। उनले परियोजनामा प्राप्त कर्मचारीहरू भएमा मात्रै बजेट खर्च भएर पुँजीगत खर्च बढ्ने बताए।
त्यस्तै समितिको बैठकमा नेकपा एमालेका उपाध्यक्ष तथा पूर्व अर्थमन्त्री सुरेन्द्र पाण्डेले कर्मचारी संयन्त्रले संघीयता नरुचाएको बताए। उनले माथिल्लो तहका कर्मचारीहरूमा तल्लो तहमा काम गर्न नरुचाउने प्रवृत्ति बढ्दै गएको बताए।
कर्मचारीहरूको यस्तो प्रकृतिले विकास निर्माण तथा संघीयता कार्यान्वयनमा मात्र नभई बजेट खर्चमासमेत प्रत्यक्ष असर परेको उनको भनाइ थियो।
कर्मचारीतन्त्रलाई केन्द्रीकृत सेवामा रहेर जागिर खानु छ भने जनतालाई विकेन्द्रीकृत सेवा चाहिएको पाण्डेले बताए। अर्थ समितिले बैठकमा बजेट बढी छुट्याइएका मन्त्रालयहरूले पुँजीगत खर्च गर्न नसक्नुको कारणबारे विभागीय मन्त्री र सचिवहरूसँग जवाफ मागेको थियो।
तपाईंको ईमेल गोप्य राखिनेछ ।