हेटौंडा : बागमती प्रदेशको सबै स्थानीय तहमा आवश्यकताअनुसार गठबन्धन गरेर जाने सहमति भएको छ।
आगामी वैशाख ३० गते हुने स्थानीय तह निर्वाचनमा प्रदेशमा रहेका सबै स्थानीय तहमा आवश्यकता र औचित्यअनुसार मिलेर जाने पाँचदलीय गठबन्धनमा सहमति बनेको हो। नेपाली कांग्रेस बागमती प्रदेश सभापति इन्द्रबहादुर बानियाँको अध्यक्षतामा बसेको गठबन्धनको बैठकले यस्तो सहमति गरेको जनाइएको छ।
बैठकमा प्रदेशका १ सय १९ पालिका र १ हजार १ सय २१ वडामा नै आवश्यकता र औचित्यका आधारमा गठबन्धन गरेर जाने सहमतिमा पुगेको पाँचदलीय गठबन्धन संयन्त्रका सचिव राजु नेपालले बताए। काठमाडौंमा आइतबार र सोमबार दुई दिन बसेको गठबन्धनको बैठकमा बागमती प्रदेशका नेपाली कांग्रेस, नेकपा माओवादी केन्द्र, नेकपा (एकीकृत समाजवादी), जनता समाजवादी पार्टी र राष्ट्रिय जनमोर्चाका पार्टी प्रमुखको उपस्थिति रहेको थियो।
यसअघि बागमती प्रदेशका पाँचदलीय गठबन्धनले आ–आफ्नो दलमा पालिका र वडामा मतको विश्लेषण र प्रतिवेदन बुझाउन मातहतका निकायलाई निर्देशन दिइसकेका छन् भने बागमती प्रदेश गठबन्धनले पनि तत्कालै साझा सहमति गरेर केन्द्रमा प्रतिवेदन बुझाउने तयारी गरेको सचिव नेपालले बताए।
तपाईंको ईमेल गोप्य राखिनेछ ।